قلبي ما يطيق

[جنجير]

ياخيك هــي إياها وقلبي مايطيق
أنا ابتلشت بوقتي وكذابتـــه

واللي موقفني على نص الطريق
سؤالي ياللي مالقيت إجابتـــه

الطعنه إليا جات من كف الرفيق
الغالي اللي له علو من ثابته

اكذب الطعنه بدم اللي يريق
ولا أصــدق عذره وسبابته

ياصدري اللي من حريق اليا حريق
حتى جروحك من ربوعك نابته

ماعاد فيها لاخوي ولاصديق
حطاب جرح الوقت مفني غابته

ياقل خلان الرخا عند المضيق
وياكثرهم عند الطرب لعابته

به خوتن يشبه لها العود العتيق
على السنين تزيد طيب وثابته

وبه خوتن كنها مثل خاطي زريق
فكت مع أول شوط عقبه هابته

دام الأخوه والخوي أخ وشقيق
طلقت رفقات الردى وزلابتـــه

أخي هو اللي وجهه بشوفي طليق
مصيبتي كانها هي اللي صابته

اخي هو اللي معي حزة كل ضيق
لو كانت أمــي ماهي اللي جابته

صكات بقعا خلت النايم يفيق
والطيب مانجهل فعل سبابته

كم روس لابه فعلها ماهو يليق
وكم رجل فعله ينومس لابته



حمد البريدي
http://www.youtube.com/watch?v=bGPDBRCRIKs

[عبدالله الراسبي]

اخي العزيز جنجير تسلم على هذا النقل الجميل
ابيات جميله ورائعه
ويسلم شاعرنا القدير
ودمت بكل خير وموده اخي الكريم
وتقبل تحياتي

[هيثم العيسائي]

يا سلام نص جميل


تشكر أخي الكريم على الأختيار الموفق والمتقن