حيطة سد....

[جمال نصير]

حيطة سد...
أي سكة تمشى فيها ..راح تقابلك.. حيطة سد..
تمشى دوغرى..
أو تلف شمال يمين ...
فى النهاية ... راح تقابلك..
حيطة سد...
*****
خلوا بالكم ..دا ف مصر...
بس مصر..
والتساؤل...ليه ف مصر..؟؟
هل قدرنا...
هل إرادة شعب عايز بس ينطح...
أى حاجة...
حتى لو كات ...حيطة سد...؟
هل تعوّد ...
هل عصابة ف كل حته...
قاعدة تبنى سدود .. موانع..
تملى بيها دروب حياتنا..
تبني بين الناس وجوا الناس ...حدودها
لجل نلقى الدنيا .. فينا ...
حيطة سد..؟؟
*****
لما ينبض فيك ضميرك..
راح ينغص ليك وجودك..
لو تبيعه..
راح تضيع وياة حياتك..
فالنتيجة ..هى هى ..
دوله ناسها بدون ضمير..
أو ضمير مركون ف بير..
هى هى ...
حيطة سد..
*****
لما يبقى ف مصر عالم..
شيخ جليل..
بس ملهوش أى قيمة..
بس فوق (ع الرف) مركون أو ذليل
والعوالم عايشة فوق الكل ..
فاردة ... جناح وديل..
فالنتيجة ..هى هى...
شيخ وعالم مربوطين..
زي عالمة ...وطبالين
هى هى ..
حيطة سد..
*****
لما شعبك يبقى جاهل...
عينه شافت ..
ودنة سمعت...
جلده ولع مل عاشه...
بس عايش زى تور الساقية ..متغمى عنية
والحرامى..
ماسك الكرباج بيضرب ..لما تور الساقية فكر..
إنه يرتاح...
وللا يهرب...
والحرامى ... أى خولى ف الوسية...
من قساوة قلبه ...ساكت..
عنده خير الساقية هو كل همه...
مش مهم التور يموت...
فالنتيجة هى هى ...
تور بيحلب فيه حرامى ...
هى هى ... حيطة سد...
*****
دى بلادنا ..
مش مصدق... اى حاجة مل قلته....
تبقى انت التور يا إما..
الحرامى...
وللا أنت بدون ضمير...
أو ضميرك حى وانت ...
الضرير..
تبقى انت م العوالم ..
وللا عالم ... زى وهم بدون دليل..
مصر يا صاحبى يادوبك؟؟؟
سكة واحدة..وف نهايتها هتلقى..
حيطة سد ..
والمصيبة..
اننا يا صحبى حبة طوب ف ايدهم..
يبنوا بينا ...اى حيطة..
بس حيطة فى حارة سد..
*****
جمال نصير

[وهج الروح]

وما بعد الربيع العربي


الا موت ضمائر أصحابها لا يجيدون
سواء التنفيذ دون تفكير حتى يصبحون
أداة في أيدي من لا يرحم في زمن كل شي
جميل فيه قد تلاشى حتى تلك الشعارات التي
كنا نامن فيها ''' نص وضع مصر الحالية بين
أيدينا وكأننا نقرأ قصيدة ناقصة حفظنا جزء منها
والجزء الآخر تناسيناه عمدا... مؤلم خوي.



تحياتي

[صالح السنيدي]

جمال نصير

شاعر جميل أنت يا أخي تحمل كل معاني الجمال

لله درك ..

[جمال نصير]

وما بعد الربيع العربي


الا موت ضمائر أصحابها لا يجيدون
سواء التنفيذ دون تفكير حتى يصبحون
أداة في أيدي من لا يرحم في زمن كل شي
جميل فيه قد تلاشى حتى تلك الشعارات التي
كنا نامن فيها ''' نص وضع مصر الحالية بين
أيدينا وكأننا نقرأ قصيدة ناقصة حفظنا جزء منها
والجزء الآخر تناسيناه عمدا... مؤلم خوي.



تحياتي
وهج الروح...
والله لمستى الجرح بعينة .. نحن الان نعيش بين أجيال ميتة الضمير وصخرية القلب...لنا الله
شكرا لمرورك الطيب

[جمال نصير]

جمال نصير

شاعر جميل أنت يا أخي تحمل كل معاني الجمال

لله درك ..

أخى الكريم صالح.. مروركم تشريف وتكريم ..بارك الله فيكم