بعثرة قلم وصدى ذكريات

[علي المقبالي]

سنه اولى جرح وغياب:


يا طير خذني لديرته يا مهاجر
مـ اقوى الفراق وضاق بالهم صدري


مرت سنه وانا على البعد صابر
واللـيل يسرق بالسـهـر طـول صبـري

يا ليتني يا طير مثلك اسافر
او ليت خلَي في دجى الليل يسري


انا قـتيـل صابنـي سـهم غــادر
سـهم صـنـعـتـه من خـيالـي وفــكري


وانا غـريـب مر بالارض عابـر
لا تسـألـينـي مـن انا..صـدق مدري


فـي داخـلي بركـان للـحين ثايـر
وارضي الجنون وامتطي الحلم مهري


وانا سجين عاش في قلب شاعر
وانتـه قرين الروح سـجـنك بـصـدري


وانا وحـيد بدنيتي عشت حـاير
وافـي ولـكـن داخـلـي حــس غـدري


لكـن احـبك صـدق والحب كافر
مخلـص بحـبـك بـأول الـعمـر بدري


احـلم بقـربك لكـن الحظ عـاثر
ضـاع الرجا يا قـلب والعـمر يجري


ما اجبرك تمشي ورى طيف عابر
ليـت العـمر يهدى واهديـك عمـري


حرقـي الرسايل كلـها والدفاتر
دامـك نويتـي يـالغلا صدق هــجري


وان كان هذي رغبتك قول آمر
مـ اقبل اكـون بحسبتـك كسر عشري

[علي المقبالي]

اتأمل وجه هالعالم بعينك
كنها بلورة السحر العجيب

واشعر ان الوحي في لمسة يدينك
والبعيد بلمسها يصبح قريب

وش يكون اللي جمع بيني وبينك؟!
هو خيال او سحر او واقع غريب؟!

[علي المقبالي]

في الذكرى السنويه الثانيه للجرح



سـنتين جـرحـي حـي ينزف ولا طـاب
سـنتين يا لـيل الـشـقا في عذابي

شـاب الصـبر وجـرحك المر مـا شاب
يا جـرح يكـفي وش بقى من شبابي

مـسافر على بحر الأمل والرجا خاب
وامحـنتي.. وابلـوتي.. وامـصـابي

أنـسى؟ حـشى لو قلت انساك كذاب
سـنتين باقـي ريحــتـك في ثـيـابي

سـنتين وش باقي بعد حـي مـا ذاب
أهــذي كـما المجنون ضـايع صوابي

حـبن حـفـظـته بين عــيني ولهــداب
باقـي مـعـي في مـوطـني واغـترابي

واليوم صرنا نلتقي مـثل الاغراب
يســأل بعـينه وفعـيوني جـوابي

وين الصبر والـشوق طــاغي وغـلاب
وين الصبر والـشوق عـنده سـرابي

يا صاحبي طيفك معي حـي مـا غـاب
حـتى واناشـرب صــورتك في شـرابي

في خافق رغم الشقا عـنك مـا تاب
في مـقـلـتي في دفــتري في كــتابـي

حـسبي عـلى دهـرن يشـتت بلحـباب
حـسبي عـليه كيف انقلب والتوابي

ويا لايمي ما في الهوى لـوم وعـتاب
يا لا يمي خــبت بـشـوقي ركــابي

يا لايمي ان كان لك في الهوى احباب
يا عـل يجـرابك مـثل مـا جـرابي

[علي المقبالي]

معاذير شاعره زارت كالطيف ثم تلاشت كالحلم ... ما اروعك وما اروع ابياتك التي لازالت تترنم في ذاكرتي .. ليت الحلم يعود ويزهر الشعر بساتين يانعه


حب جرحني يا خويي ولا تاب
ما ابيه لو هو عالق في ثيابي

ما اهوى غرام يدمي قلوب الأحباب
ويسرق من الايام زهرة شبابي

عمري وأحاسيسي وقلبي والأهداب
ما أرخص بها في حب كله عذابي

لن ياه قلبي من الضما ناره تهاب
يسقيه نار تحرق الي بقى بي

وان شفت كل الناس من دونه أغراب
وييته أزيل الهم زاد اغترابي

لا يا خويي يوم شفت الرجا خاب
وش انتظر عقب الألم لي غدابي

لو هو دمي لي داخل القلب ينساب
ولو هو حبيس ن بين لبة هدابي

بتركه لين الوقت يهديه لغياب
ويعلن عليه القلب تالي انسحابي

وجرح ن نزف بأقصى الضماير ولا طاب
ربي عليه يعين ويجبر مصابي

ويرزقني بنية جريح ن ومصطب
وع الصبر في الحزات يجزل ثوابي

ويجزيني بصبري من الناس الأطياب
وحب ن يرجع ما مضى من شبابي

[علي المقبالي]

للجرح زفــره وللمعاذير اســباب
ومـعـذور خـلّي لـو سـعى في عذابي

والذكريات تمر تطـرق عــلى الباب
وافـتح لـهـا يمـكـن تخـفف مـصابي

تعبت يا جرحي الشقي شــوق وعتاب
ليت الــذي اهــواه حــس ودرابي

لبّست عـمـري مــن عــنا همّي ثياب
وقـتلـت في ذكــراه زهــرة شبابي

حــتى عــذولي لــو سـمـع ونتي ثاب
لـكن (م)اشـكـي لـو لأقرب اصحابي

انا وجرحي وصـاحـبي كـلنا اغـراب
وانا مـعـاهـم سـلوتي في اغـترابي

يا خـويتي لا تعـذلي شـخـص مـنصـاب
من صاحب(ن) اغلى من اقرب اقرابي

لـو هـو غـدربي قلت ناكـر وكذاب
وصــوّبت في ذكـــراه اعــتى حرابي

لـكــن حـــبيبي دوم وافي وجــذاب
وللحـين لا جـــاته بلـيّه اعتزابي

المـشـكـله اكـبر من ادراك للالباب
وصــفي لــهـا مبهم/عتيم وضبابي

لليل ســتر وللـقدر ســيف وانياب
والـصــبر للــرجــال قدر ومهابي

والقلب خــاوي فديرته تعوي ذياب
مـكـتوب واقـبل بالـقدر في كتابي

روّح عــسـى دربه تسـاهـيل ورحاب
وانا رجــعـت لواقعي مــن غيابي

يا خويتي كــل جــرح من طلتك طاب
والوجد مــع ابيات شـعرك سـرابي

[علي المقبالي]

معاذير

لو صاحبك يدري بجرحك والأسباب
ل نهلت دموعه ك وبل السحابي

ولو صاحبك مأسور قلبه ومصطاب
لأنصاك لو ع الحب قلبه يعابي

بعض البشر حظه مع الحب ينهاب
والبعض حظه طايح ن ف الترابي

ما الوم قلبك لي عن الحب ما تاب
ولا الوم جرح شاب قبل الشبابي

لا توصف احساس غريب وغلاب
هذا خوي الروح وقت اغترابي

ما ينوصف لو هو عن القلب ما غاب
ولا له مع القاموس رد وجوابي

أحس به ينساب في لب الألباب
وينزع على الغفلات باقي صوابي

ما كفته روحي وعيني والأهداب
ولا ما بقى مني ولا ما بقى بي

كلي أنا له راضيا او بي عتاب
ما أملك من النفس الا عذابي

لو تعبر دموعي من العين باسهاب
ما تطفي العبرة لهيب سطابي

ولو ينطق الشريان لي بالهوى ذاب
ويشكي عذابه,,كل مولود شابي

لكن ربي يلطف بحال مصطاب
ويلهمني السلوان عقب المصابي

وارجع وأقول الوقت كافي يالاحباب
وبعلن عليه بيوم تالي انسحابي

ويا أخوي من شعرك ترى دمعي انساب
يروي من العبرات سفح الروابي

وكل العشق لي يى عقب عشقك انعاب
وكل القصايد عقب شعرك تعابي

[علي المقبالي]

الصقر (علي)


ونّيت والخـاطر به الوجد شــبّاب
وابكيت حتى الصخر مـن زود مابي

احباب كنا وينهم ذيك الاحـباب؟
راحوا مع الاقدار اغـلى احبابي

لو كان بيدي لجلها اقـطـع رقاب
واســري بها في بحــر موجه عبابي

لـكن تمنعني مــواجـيب واســباب
الجم بها طـيشـي واكــتم عـذابي

وادري حبيبي دمعته وابل ســحاب
وافي ولا يـسـمـع عــذول وشـابي

بس القدر حكمه على الناس غلّاب
ســيف مسـلط فوق عاتي الرقابي

مـدري شـقيقة روحي الحلم كذاب؟
الـبارحـه حــلمي يثير ارتيابي

حـلمت كـن اللي مضى سافر وغاب
وبديت درب(ن) فـيه بسمة شبابي

طــيف(ن) تبسـم لي ولبسني حـجاب
وخذني معه مـدري لوين انتهابي

معاذير شعرك فارس(ن) فز وثّاب
زخات غيث(ن) من مزون السحابي

[علي المقبالي]

معاذير


يا ما ارتوت الاقدار من دمع الاحباب
ويا ما احتوت القلوب هم ومصابي


ويا ما انكسر حلم به العاشق انساب
وخبت عقب سير طويل الركابي


مادري القدر حكمه على الناس غلاب
ولا الهوى طبعه هموم وعذابي


ما كل من نهواه يهوى لنا اسباب
وما كل من يهوى هوانا نحابي


بعض الهوى يسقي المحابيب الاطياب
وبعض الهوى يسقي القلوب اغترابي


والصقر لو جرح الهوى فيه ما طاب
يبقى شموخه عاليا ما يهابي

[علي المقبالي]

هل يا ترى يا جرح باقي بعد شي
دمع ودموع وكل غالي نزفته

ما عدت افرّق ظلمة الليل والضي
والحب والاخلاص والشوق عفته

[علي المقبالي]

بكره الخميس اللي به الناس ترتاح
وتشد صوب الغاليين الرحايل

وانا هنا في غربتي ليل واشباح
تلفح بقلبي نار شمس القوايل

الحظ عاثر والامل نور مصباح
يالله تهديني دروب الفضايل

يا ليتني ما بين غدوه ومرواح
في عزبة(ن) فيها خيار الاصايل

اصبح بنشوة ريحة البن لا فاح
واسهر على نار الحطب والمخايل

قلبي خلي: لا حب..لا هم وجراح
مابي قصور ولا ابي مال طايل

ما غير سجاده وفي اليد مسباح
والغيم يمطر فوق راسي همايل

[علي المقبالي]

محتاج لك وقت العصر تحضنَي
في حضنك الدافي ابي تدثّرني

اسبوع وآنا ارتجف فغيابك
غيمة غيابك بالاسى تمطرني

ياللي عيونك غابةٍ من نرجس
خذني من ايدي يا الغلا وحررني

محتاج احيى مثل باقي العالم
المس وجودي مثلهم واشعرني

يرضيك يعني احتضر بغيابك؟
اطلق سراحي قبل ما تخسرني

شفني وانا عاقل وماني عاقل
ما غير قربك يا الغلا يخدّرني

[علي المقبالي]

سداب قصة الف ليله وليله
ضميتها في داخل عيوني كتاب

لهيبها جنة ونسمة عليله
وجبالها نرجس وكادي وعناب

هذي عروس البحر هذي الاصيلة
تهيم فيها قلوب وارواح والباب

صباحها همس الحمام وهديله
وليلها نغمة من اوتار زرياب

هذي سداب السهله المستحيله
احضانها اعذب من عناق الاحباب

يا سداب بي جرح يتزايد صهيله
ضميني بحضنك عن عيون الاصحاب

يا الملهمه يالحالمه يا الضليله
ارضك تبر او مسك في صورة تراب

الناس تعشق كل حسنا جميله
ومالومني لو صرت انا عاشق سداب

[علي المقبالي]

لا ادري لماذا يدفعني صوت المطر لهاوية الحزن
ربما يقلب صفحات دفتر ذكرياتي ويتركني اسيرا لها
ليتك ايها المطر تزور بلادي الغالية كما تفعل هنا كل يوم بلا هواده

[علي المقبالي]

غني على غصن الشجر يا حمامه
غني مدام الله عطالك مواليف

وانا عسى اني اجي بالسلامه
واسجع واغني عند زين التواصيف

[علي المقبالي]

العيد قرّب يا علي وانته بعيد
وش فايدة عيدٍ بلا شوف الاحباب

ما ريد لا فرحة ولا ثوبٍ جديد
يكفي اشوفه بس واقف على الباب

[علي المقبالي]

هلّي على وجهي الامل واغسليني
خلّي المطر يمسح شقى عمر وجراح

هلّي قبل هذا الحزن يحتويني
وتثمر بي الغربة متاهات واشباح

العالم المدفون في وسط عيني
ضجّة صراخ تحيطني وضجّة ارواح

يبست غصوني وما بقى من سنيني
الا الخريف وداخلي برد ورياح

يا وحشتي حتى انا ما ابيني
ويا صبر دمعي رغم الاوجاع ما طاح

انا المعلّق بين قلبي وبيني
وانا المحلّق في السما وحلمي جناح

غربه والم / وحشة وندم تعتريني
وهذا الطفل شابت سنينه ولا صاح

راحل شراعي حلم والريح ديني
فكري سفينه وزادي ايمان وكفاح

خلّيت حتى الليل يحتار فيني
روحي على رغم الشّقى نور مصباح

هلّي على وجهي الامل وامطريني
سحابتي جيبي لـِ هالضّيق مفتاح

جيبي حبيبٍ وين داره وويني
يالله عساه بزحمة العيد مرتاح

اتخيّله وآمد صوبه يديني
واشم عطره في مدى الكون فوّاح

كل عام ارسل له هواي وحنيني
وكل عام واعياده فراشات وافراح

..
.
__________________

[علي المقبالي]

قابع في غرفتي اقلب صفحات الزمن

اليوم عيد ... هكذا يقولون ولكن ...

ما العيد في بلاد لا تدري ما العيد

يتساقط المطر كما تتساقط الاحلام

انظر من شباك الغرفة ...

الاشجار في ثوبها الخريفي المطرز بالالوان

صامدة في وجه الريح والمطر

استمع دون اصغاء لصيحات الاصدقاء تنادي للخروج

تدفعهم الامنيات للمراكز التجارية المزدحمة في لندن

علّهم يتناسون وحشة الغربة

ولكني هنا اليوم اكثر استمتاعا بلون الشجر وصوت المطر من زحمة الاسواق

سأبقى هكذا محلّقا ومحدّقا بلون الشجر وعزف الريح والمطر

[علي المقبالي]

يا وطـــن راجع بشوقي وحــيرتي
يا وطـــن راجع واحزاني كـبار

وين راجـــع وا أســـاي ومحنتي؟
وين راجـــع والأمـل قفّى وسار؟

في الســما عــشرين سـاعه رحلتي
حـــابس دموعي واوقاتي احتضار

شــايلن همّـي بحـــقـايب لــهفتي
وذكـــريات الأمس واحلام الصغار

وشــايلن قـلبي القـتيل بـراحتي
ولابســن حــبك عـلى عنقي سوار

تـرتجف رجــلي وتـرجــع خـطوتي
وانسـكـب دمعي عـلى ارض المطار

آآآآآه يا شـــوقي وحـبي ودمعتي
يا الظلام اللي كسى وجه النهار

ارتـســم طـــيفك وحــيد بمقلتي
غــصـب عـني دون وعـيٍ واخـتيار

اشـــــتكيك لمين يســمع شكـوتي
حــــبك اللي لــفّني نـورٍ ونار

ايه احــــبك وســاكنه في مقلتي
وكـــل لحـظه دون ما شوفك دمار

لحـــظـة غـيابك اســاي وبلوتي
ويـوم اشـــوفك ذكرياتٍ وانهيار

ويـن اروح وويـن اولّـي بحـالتي؟
اكـــتوي بالعشق وعيوني شـرار

عـــاشـق وغـــاضب وتشهد رجفتي
في دروب الحــب ما شــفت القرار

حــبيبتي .. حــبيبتي .. حـبيبتي
اسمــعـي بقـولـها بكـل اختصار

في دروب الحــب هــــذي عــادتي
لا خــضـعـت ولا نـويت الانكـسار

ولا بـوطّـي الـراس وارخي هـامتي
صـــقرك الغالي كـتم جرحه وطار

[علي المقبالي]

سداب قصة الف ليله وليله
ضميتها في داخل عيوني كتاب

صباحها همس الحمام وهديله
وليلها نغمه من اوتار زرياب