حمود البخاري

لا تّغشّا ... لي معي ( ياهل ) وَانَا حْمود
خَلَّه لا يبكي ويفضحنا معه

جيت وحدِي وْ هالصغير اللي أنا قود
هاذا قلبي .. مادري من طلّعه !!

مِنْ سبوع آدوِّره وَاحْسِبْه مفقود
وَاثْره عالموعد سبقني يِلْقَعَه !!!

ظلّ سَمْرَه وْ دفءِ صِلْبُ وْ نفحة النود
لا تقولُ أُفْ هالبديوي يِقْلعه

دشّ قلبي لا جرس تضرب ولا هود
لا تضيّقها وهي فيها سعه

دشّ بيدينك قنابل وِاضْبط ( الكود )
وْ كلِّ عرق ٍ ما نبض لك نقّعه

زورنا يوم الليالي الحالكه السود
لا تورِّي سْراج آهَا وْ لا َ شْمعه

لا تغرّك بسمة الواشي وِ لِحْسود
الحرامي ما يسوّي قرقعه

وْ كلّ حَبْلٍ صار بينَ اثْنين ممدود
لاَغْفلوا عنَّهْ يجي من يقطعه

إي أغار وْ غيرتي ياخي بلاَ حْدود
حتى شِعري لا تقولَ ابْغَى اسْمعه

إنت قلت الدنيَا حلوه وآنَا مَيْهود
أَدْعِيَ تْقوم القيامه بِسْرَعه !!

يعني لا من شفتني في الناس موجود
لا تجي ... آغار .. رُح في مقطعه

الحلو لا قام يمشي وِسْط لِحْشود
يغدي كيكه للجميعِ مْقطّعه

لا تقول أنّي غيور وْ غيرتي طود
التّضادَ احْيان يخلق منفعه

لولا جمر النار ما شمّيتَهِ العود
ولولا ضرب الطَّبْلِ لا ماتسمعه

يعشقِ سْعود الذرهْ نيّه .. وبُوسْعود
أَحْلَى أكله عندَه محروقِ إصْبعه

ياخِيَ اسْتعبط شرى استعباط مسعود
عنده كلمة روح معناها تعه !!

إنت لو قلت الشِّعر ما فيه أي فود
والله ماقوله ولا والله اسْمعه

ولو تقولِ مْطالعك لِلْبَدْر منقود
وْ رِفْجِتِكْ ليلي بطوله مَاطْلعه

بَعْمِي ِ عْيوني وانا ما أَخْلِفُ وْعود
عن فِ يومَ اغْفل وراسي أرفعه

قالوا تِتْفاخَرْ بِأَنّكْ صاحبي زود
وِصْوَرِيْ في غِرْفِتِكْ مِتْربّعه

إنتبه لا جا أُبوك وْ صاح يَا عْنود
من ذا راعي القبَّعه لِمْربّعه

قولي ذا حمود البخاري العالم العود
بسّ واحد راسمنَّه بْقبّعه !!!

حمود المهزاع