منتديات السلطنة الأدبية - أغفو على همس الوطن

أغْفُو عَلى هَمْسِ الْوطَنْ
..................في خافقي حَلّ وْسِكَنْ

أسقيهِ منْ صافي الْهوى
..............أطبقْ عليهْ رِمْشِ الجِفِنِ

لو شَطّ بي درب النّوى
................أوْلهْ عَليهْ روح وبدن

من ذاقِ حُبّهْ وانْكوى
..................يِهْديهِ عُمْرهْ بْلا ثِمنْ

الله عليه بدْرنْ ضُوى
...............منْ حِسْنهِ يْغارِ الْحِسِنْ

ويزيد في عيني غوى
................لي شفت أوطانٍ زهن

ظامي فُوادي وُارْتُوي
.............من غيثِ جودن كالمزنْ

صُوبَهْ طِريقي مَ الْتُوَى
..................قَلْبي لِغيرهْ ما رَكَنْ

ما يوم في عيني ذوى
...............حاشا ولا صابه وهَنْ

ذِخْري وِلِجْراحي دُوا
..............لعيونه يطيب الشجن

اسْمهْ رِفيعِ الْمِسْتوى
...........أعْزِفْ عَليهْ أحْلى لَحَنْ

يَ اللهْ نِغنّي لِهْ سُوَى
............صِنْديدِ مَ يْهاب المِحَنْ

رافِعْ جِبينهْ وِالّلوا
................وِلْكيدِ عادي مَا ذَعَنْ

كيدهْ فِ نَحْرَهْ لِي نُوَى
.............مَحْروسِ مَ امْتدّ الزّمِنْ

أم عمر