أحبابي و أساتذتي السلام عليكم...............بدون مقدماااااااااااات فريش اليوم مذبوحه...............
القلب فاسد ما نفع فيه الصلاح
"وأصغر" ذنوبه دوم في ذنبه يصر
كنت أحسبه سالي من العشق أستراح
ماكنت أضن حّبه لشخصك منحصر
بالأمس شفتك وأجهش القلب بصياح
ياليت ما مرّيت يم بيتك عصر
غنّيت لك ( شفتك وقلت البدر لاح )
هالأغنية بالذات تعصرني عصر
آخر كلامك –هالشطر- قبل المراح
من عقبها غبتي... غيابك ما قصر
طوّلتي الغيبه ألين الحب طاح
طيحة ملك يا ما تعوّد ينتصر
ما دام حبك كوخ....شّلته الرياح
ولا أنا لازلت عايش فالقصر
ذاك القصر بالرغم من كل الجراح
ثابت مثل خوفو وسط بيدا مصر
أغلقت قلبي لو عصرنا فأنفتاح
ما يسكنه غيرك يامعجزة العصر
لا ما كرهتك والذي سن الصباح
الي يشوف الدرب ما عاف البصر
يا ما سهرت الليل وأحزاني وشاح
طيفك وساد وفارش همومي حصر
من كثر ما دمعي على فرقاك ساح
واديه يجري من عيوني للخصر
ياليت حبك راضيً يطلق سراح
ماكنت بلقى من ورى دربك إصر
وما دامت أيامي بتوديعك شحاح
آخر طلب من قبل عمري ينقصر
قبل السفر أرجوك أبي منك سماح
((ودّي أصلّي في ترابك لو قصر....))