[احمد المعمري]

بقطع علاقاتي مع الناس واغيب
عن مجتمع مابه مواليف واحباب

اللي يقدم طيب ما يجني الطيب
واحسانهم يا هالبشر صار بحساب

كم لي وانا اكتب عن الحب واجيب
اللي قلم غيري بغا ولا بعد جاب

لو كان يدري هالقلم بالمواجيب
ما مات باسباب الجفى منه كتاب

نكبر ونكتب عمرنا زيف ونشيب
ما ندري ان العمر ب اغلاطنا شاب

نشتم زمنا ونعذر النفس ونعيب
يا هو زمنا لو نطق للبشر عاب

نبني امانينا على تصيب وتخيب
يا كيف بس تصيب والحظ كذاب

كل عام واحبابي على صحبة الجيب
كل عام واحبابي على الصحبة اغراب

كل عام وايام الجفى مابها ريب
كل عام يسكن داخلي ويرحل اصحاب

كل عام واحبابي بلا اي ترتيب
كل عام محد بضيقتي يطرق الباب

كل عام وافراحي بلا اي تهذيب
كل عام يكفر بي الحزن والبسه ثياب

يا ذيب لا تشره على الوضع يا ذيب
لا بح صوتك بك ولا ردوا ذياب

ما ودي اعض اصبعي زود واغيب
فم الندم يا صاحبي ما به انياب

اللي يقدم طيب يجني له الطيب
لكن على قول المثل طيب بحساب