فقير الحال يشكي الحال=دمير وينقم العيشة
ضرب في نحسه الأمثال=وبات بدون تحويشة
بشغله مانجز أعمال=و ينطر يوم تفنيشه
ولاهمه مَرَة وعيال= ولا شربه ولا عيشه
ميلقى حتى خبز ودال=ولا مشكاك وسندويشة
ولا لقمة تريح البال= ولا شطفة تقرميشة
واذا حصل بجيبه ريال= تعاطى الخمر والشيشة
و(أفضل) بين أنفه مال =وضربله كم تحشيشة
لبس ثوبه كما الطربال=وكمّة تشبه الخيشة
إذا يطلب معونة ومال=يحصل ألف تطنيشة
واذا يمشي مع العذال= في راسه عرف و كشيشة
مسوي فتوّة ورجال= وباقي الربع دراويشه
غدا جسمه بدون احمال= خفيف وفي الثقل ريشة
يشوفونه مثل لعوال= ولابه لحم و كريشة
واذا يكتب لهم مرسال=في خط اليد تخربيشة
وفي بيته بدا الاهمال=كسر كل باب ودريشة
ولا من ليت به شغال = ولا واير ولا فيشة
إذا يدوِر على شي زال=يطيح البيت تنبيشه
وفيه النمل صال وجال =ببيته مدربٍ جيشه
وفار فيه كما الجوال =على الجدران تخشيشه
يريح جسمه في الأوحال=تحت سدرة أو شريشة
يبي سيرفس مثل لنعال=وصبغه بعد ورنيشه
يجيه الأمن بالأغلال=ويحبس بعد تفتيشه
فقير الحال جنونه طال= محد يقدرعلى طيشه