السلام عليكم ورحمة الله وبركاته اسعد الله اوقاتكم بكل خير وموده
اخواني الاعزاء
اليكم هذه المحاوره في فن امبم بيني وبين الشاعر القدير
محمد بن عامر المشايخي
قال محمد المشايخي
من هالعشق حالي تعيب
والقلب زادت ونّته ************ يبكي من فراق الحبيب
ونّه بعد ونّه تزيد ************* انهم ولا حد من مثيب
يا بونصر روحي ارتْمت ******** ما بين لجّات المغيب
الشمس تشرق م الشرق ****** وانا اقول شمسي تغيب
اذكر ليالي ماضيات *********** كنّا على طيب ومطيب
واليوم زادت علّتي ********* وسط الحشى لاهب شبيب
جاتني علوم امس الضحى ** يوم الخميس عرسه زهيب
هم كلّفوه غصبن عليه ******* يوم اربطوا عنده شهيب
والخاتمه ابغى الجواب ******** لي يريّح القلب العطيب
قال عبدالله الراسبي
امرك ويا دنيا عجيب
الحين يات حليلتي ********* وصرخان ينهم ع الغضيب
لن سلتني عن هالدّنا ******** بو عناد ما حد لك مجيب
الله يعينك يالشّجين ********** تبكي ودمع عينك سكيب
هيش حيلتك وامرك عليه **** لي مشورته في يد غريب
ومن هالامر ماشي مفر ********* لوّن يكثّر في النّحيب
بيجيه يوم ويرتحل ********** ويدعاك في همّك صويب
في شرع ميثاق الزّمن ********* م يطير ظبين م العزيب
بوصيك تنساه وتهجْ ********** وبيكون لك غيره طبيب
وادعي ربك في سماه *********** يهوّن الجرح الصّعيب
والخاتمه اولى الصّبر ******* وعلى المدى جرحك يطيب
وتقبلوا تحياتي