السلام عليكم ورحمة الله وبركاته
واسعد الله صباحكم ومسائكم بكل خير،
جالة بخاطري ذكريات ومشاعر عابرة وحبيت اطرحها عليكم وعساها ترقى لذائقتكم الشعرية .
ما مر بك ذكرى حبايب وغالين
واوقات من عمرك تولت وراحت
وطافت بك الذكرى على ايام وسنين
وتمردة دمعه بعينك وطاحت
ودك تخبيها بعينك ولا تبين
وبغيت تمسحها بكفك وساحت
مالومها من بعد فرقى المحبين
وما لوم نفسي لو توجد وناحت
ناس بروحي مثل ورد البساتين
اقفوا وعيني بعدهم ماستراحت
يسري غلاهم في جميع الشرايين
واطيافهم مرت بعيني ولاحت
وصدى سوالفهم باذني الى الحين
طوتهم الدنيا بعيد وشاحت
نضحك وحنا عن ضنى الهم لاهين
ياسرعها لامن تولت وباحت
نحسب على جمعة ربيع (ن) وعيدين
فيها البراءه مع شذى الطيب فاحت
ايام كانت للسعادة عناوين
منها بكت عيني بحرقة وصاحت
خالد الحربي