[سالم سعيد المحيجري]

محاورة بتاريخ 15/12/2015عن طريق الهاتف بين محمد بن راضي الداودي وسالم بن سعيد المحيجري

محمد راضي:


سالم يقولوا عنك شاعر ن مذروب

نبغى نتسمع من كلامك والمثل

سمعت عنك مسوي للجماعه قروب

ومشاركنهم كلهم من شيب وطفل

سالم المحيجري:


يلي تسمعه خله با يكون فصوب

امشي على حسب الدلالة واستدل

وناس ن كثيرة سوت فالقروب هبوب

حد منهم يرسل وحد منهم يمل

محمد:


يلي نسمعه سالم ما كله كذوب

انته بروحك عاقل منزيدك عقل

ميزان عندك لا غالب ولا مغلوب

يلي مريض بروحه لا تزيده عضل

سالم المحيجري:


يلي سمعته كله بالقلم مكتوب

ولا كلام الشارع كل حدن يشل

ولي تمرض عندنا حاله شروب

مشروب مر ونوصفه حال العلل

محمد:


سالم تمهل لاتظن الجبال تذوب

حن رصاصنا مصنوع من صم الجبل

انا طريقي واضح لا تلحقك ذنوب

آحذرك عن المغشه وطريق الجهل


سالم:


فصدورنا قصرن مشيد لك رحوب

ما بالسراعة وبالسهاله يضمحل

يا ولد راضي فالمشارق والجنوب

السمعه وحدة وشاهدة عشرة دول

محمد:


يلي مثيلك سالم ما عليه معتوب

ربي عليم بعبده وغفار الزلل

قطعت المسافه فساعه وطويت الدروب

يوما نصينا قالولي الجماعة فل

سالم:

فوصولكم تشريف من قبل الغروب

يوم صغتلي بالعسجدي عذب الجمل

بنوادعك ويا رب تغفر للذنوب

والآدمي باينفعه بعض العمل

محمد:

بدعي بمخيله والله بمرعد وشابوب

اسقي شجار الكيذى و حصدها الغلل

بختم كلامي وبخاطري مطلوب

بفضيلتك نبغى فل جروب محل

تمت