[محمد أمبوسعيدي]

السلام عليكم ورحمة الله وبركاته...

كل عام والجميع بألف خير وصحة، وأعاد الله جميع المناسبات عليكم وأنتم وجميع من يحبكم وتحبونه بألف خير وسعادة..

هنا توقيعٌ من أحرفي المتواضعة تعتذر عن غيابها الطويل، وتعدكم بالمواصلة..

قصيدة بسيطة بعنوان ( نفس السالفة ):

( سالفة )
تفتح جروحي
آه يا مر الجروح..
تنثر الملح ف عروقي
وترسم الذكرى ألم..

( سالفة )
فيني وجعها..
ينسج أحزاني ويروح..
وياخذ الحلم ف طريقه..
ضاق فيني الهم هم..

( سالفة )
فيها عذابي..
وترسم الواقع
مرايا..
وتفتح أبواب الخطايا..
تعكس آهاتي جمر..

( سالفة )
فيها آنيني..
وغيمة-ن- تخنق سمائي
آه كم فيها أعاني
مت وأنا احتضر..

( سالفة )
تحكي سنيني..
وغربة-ن- في درب ذاتي..
والهوى فيني قطفته
شوك وأوجاعه ثمر..

( سالفة )
سالت دموعي
في خدود-ن- تنتحب
وضاعت أحلام الأماني
في الدروب المظلمة..

( سالفة )
يا جرح فيني
يا عذابي الملتهب..
يا أغاني الجرح فيني..
في آذاني ملحمة..

( سالفة )
يا نبض فيني..
فاض من دمه أسى..
والغدر صاحب لحضنه..
شاب في ذاته الأمل..

( سالفة )
يا نار قلبي..
يا ظلامي في الدجى..
جيت وأحلامي تغني..
الهوى دربه مذل..

( سالفة )
وأنا في قربك
أشعل الذكرى ألم..
واحترق واطفي شموعي
من هوى سنين الوهم..

( سالفة )
يا حلم عابر
جيت وأنا احتفل
وأكتب أشعاري وأغني
وأعزف أحزاني نغم

( سالفة )
وأنتي صباحي
يا ظلامي في مسائي
ويا جنوني في كلامي
ويا حلومي الزائفة

( سالفة )
وأنتي احتفالي
يا شموعي المبهمة
احتفل بالجرح لجلك
وأنت( نفس السالفة) ..

تحياتي:
محمد أمبوسعيدي