ليلة العيد
جسمي ع كرسي مكتبي ليلة العيد
قاعد وقلبي طائرٍ فوق يبغيك
جاكم يهني أريش العين م بْعيد
يطلب رضاك وزاكي العود يهديك
أحمل بقلبي شوق.. ياذوق.. ياسيد
وابيع ما في الكون لجلك وأشريك
لنّك غناتي.. دنيتي .. كل ماريد
عمري وروحي دوم ياشوق تفديك
كانك تبي الأعيان والقلب والإيد
لاشك جاتك طوع برضاي بعطيك
إن كان قلبك صدْق يريد تأكيد
إبعث رسولٍ منْك يا زين يطريك
ينظر بعد طرواك للعين تحديد
يلقى هميل الدمع من زود أغليك
تغمض عليك العين عن كل تهديد
لنّك سواد العين والعين تحميك
وقّفْ دموع العين يالخل م يْفيد
خايف عليك الدمع م العين يرميك
أبغي لقى الأحباب في ليلة العيد
من قلبي الفرحان تسمح أهنيك
عبدالله بن خزام المعمري