حنايا الأرض
سمـانـا يالبعيـدة يالبعيـــــــــدة مالنـا جنحان
نموت أحـرار دام إن النجــــــاة آخـر أمانينا
رمينا الملـح في كل المدن ما نحسب البلدان
نسافــر ما طعمنــــــــا سكر الفرقى خطاوينا
تعبنا كثير ما نكتب عن الفرقى على الجدران
حبيبـي: مالهـا الجدران! ما تسمع مآسينا؟؟
كتبنا: يالعمـر شابت أمانينـا أسى وحرمان
ولا قـدّر لنـا قبلـة لقانــــــــــــا فــي ليالينا
توادعنــا كثيـر ولا عرفنا ضحكة البيبان
ولا فــــي بالنــا أول هـوانا لـــــو يخطيّنا
أيادينــا نبت فيـا الحنين وحظهــا الفنجان
نقلب حلمنـا..خطـوط الأماني فـــي أيادينا
نلوّن في أمانينا من أحجار السهر ألوان
ونكبــر..لو تمـوت أحلامنا تبقــى أسامينا
كبرنا اليـوم ما نرمي مآسينا على الأوطان
بتبقــى اوطاننـــــا مهمـــــا تغربنا..منافينا
كريمٍ يالنهــر مجراك لو يسقي فم الخلجان
لنــا الأقــــــدار يمٍ وينــــــا حطت مراسينا
سقى الله من لها بين المحاني مورد العطشان
على سـدرة صبـاها كـــــم ننوح وكم تأسينا
عزانا الأرض نزرع في حنايا ترابها إنسان
قريبــــة..لو رحلنـــــــــــا أرضنا باكر تنادينا
بعيــدة يالسمــــا..واللـي مثلنا مالهم جنحان
نموت أحـرار..لو شاب العمر تبقــى أمانينا
صالح الرئيسي