[بن ساعد الجنيبي]

أسعد الله اوقاتكم بكل الخير

قد يستغرب البعض من طرح هذه القصيده في المنتدى كونها قصيده مدح لشخص ما ولكن الهدف منها هو المعرفه والاستفاده من الابداع الشعري لدى شعرائنا السابقين وكيفية توظيفهم للشعر في صور بالغة الروووعه بواقع بيئتهم الجميله والان أترككم مع القصيده وفيها يمدح شاعرنا بن الضبع الجنيبي الشيخ زايد بن خليفه بن شخبوط ال نهيان (زايد الاول) جد المغفور له بأذن الله الشيخ زايد .



يالله يا كافي الأمور الشدايد
ياغافر زلات نفسي وخطاها
..
تغفر خطايانا نهار الوعايد
نهار جمع الناس في ملتقاها
..
أنته رفيع الأمر والأمر عايد
لك يامغزر سحبها من سماها
..
تغفر ذنوبي يارفيع العوايد
وكل زلة عنى ثقيلة محاها
..
ياطارش مني على شد قايد
قودا جمالية يماني سداها
..
لي درهمت بين الرمل والعقايد
تشبه على ربدا مظلة ضناها

بيت يخط بماء الذهب

..
وان قابلت بك في الخلا والبعايد
كذيبة جاعت تخب لعشاها
..
جود عليها واقصد الشيخ زايد
ان كنت باتبلغ وصاتي نباها
..
سلم عليه وخبره بالوكايد
وخصه بناجي هرجتي من قصاها
..
قل له أنا مشف له وبي شوق زايد
ان كان زوار الجماعة يباها
..
وان عاد لي عمر طويل ومدايد
بيشوفنا بالحث داره حذاها
..
بنزور مسحاب لنا في العوايد
بنحور هجن مقبلات جداها
..
عوج العراقيب السماح القوايد
كم بلغنا دار وأرض نباها
..
ودي عليهن واقصد شيخ زايد
ونخبره باقوالنا ولي قفاها
..
زايد إذا قالوا على الناس زايد
مشراق شمس ماتبغى ضحاها
..
زايد إذا قالو على الناس زايد
نور قمرها في الظلام ودجاها

وزايد إذا قالو على الناس زايد
عد رهي الما إذا قل ماها

وزايد إذا قالو على الناس زايد
ان أقبلت روس الظوامي سقاها

وزايد إذا قالو على الناس زايد
له سبلت ما قد خلت من ملاها
..
وزايد إذا قالو على الناس زايد
له مهرة يوم الملاقى حماها
..
وزايد إذا قالو على الناس زايد
له حربة دم المعادي دماها

وزايد إذا قالو على الناس زايد
شيفة حصونه كل غريب نصاها
..
وزايد إذا قالو على الناس زايد
جيد ولا كثر الخساير يراها
..
وزايد إذا قالو على الناس زايد
له هرجة وان جت عدية تباها
..
خلا مطانيف الهجن والرغايد
مسموحة من القيد تتلى هواها
..
يا شيخ يا راعي السدود البعايد
أنته طبيب العين عندك دواها
..
والرب ساعف لك وترفى السدايد
بمدة يمينك جملة من عطاها
..
وأن كان ما يمحن ولا هوب كايد
ودي برومية إنجليزي دواها
..
محط الاصابيع الثلاث العدايد
هطفى الزناد وطيحته من غواها
..
من عند سلطان يعرف العوايد
مندوبة صوبي وأنا في رجاها
..
ولا لي بمطاميع الزهد والزوايد
عندي بجوب النفس بما جزاها
..
وصارت مهازرة العرب بالجحايد
حد رفع جزمة وحد وطاها
..
والرجل ما يرضى هباب الزهايد
والنفس تجفي دايم من جفاها
..
ولا خير في وقت مضى بالحقايد
وجدودنا عند القبايل رماها
..
شلوا الرحايل وانتحوا للبعايد
وتحولوا صوب الجنوب ونداها
..
الأصل ياسي ومن شف زايد
ان كان قراب الجماعه يباها
..
ومن خبر كبار معهم مجايد
من بني ياس رسومي تراها
..
نسعى ولا معنا يا غير الجهايد
والله يعلم بالنفوس وخفاها
..
دارت دواير الفتن والنكايد
ولا حد الدنيا سلم من غثاها
..
عذر لأبو طحنون راعي العوايد
يامقدر قول الرجال وهجاها
..
ماخذ حسين العود ضافي الجعايد
من رابة ما خسر منهو جناها
..
صلاة ربي عد خوص الجرايد
واعداد ما مد القلم وانتواها
..
على شفيع الخلق يوم الوعايد
لي نفله ربه وأسماه طاها