[علي الغنبوصي]

مساء الطيب لأهل الطيب

قصيدة قديمة

علّها ترقى الى ذوائقكم


( صفحة ترابك )


نفضت الهم من ثيابي على الرمضى على غيابك

بقايا البارحه سكين بعدك باحت غيابي


لهيب الشوق خامد والمشاعر بارد اعصابك

و انا اللي بارد(ن) شوقه ولع من حارق اعصابي


صحيح الفرح بيدك والسوالف رفة اهدابك

مدام ان الحزن شخص(ن) تفيا ظلة اهدابي


و كيد ان جيت لك قومت لي من باقي اصحابك

طعونك حرقتك واليوم صارو جملة اصحابي


يناشدني عن احوالي قصيد اليوم وش صابك

على كتف الشعر ارخيت حالي شوف ما صابي


اذوق العوق قبل الجرح ظاهر لمعة انيابك

وانا للي سبة وصالك ظروفك كاسره نابي


طعنت العذل قبل السم شمت واحد(ن) عابك

وجيت اليوم تتباهى مع اللي ظنتك عابي


انا اكبر من خيوط القول لو هي حبكة اسبابك

وانا ابعد من بعيد النجم لا تسأل عن اسبابي


مثيلك بالثرى مطمور لا ما فاحت اطيابك

وانا هيل القصايد نفحتي هن ريحة اطيابي


اعاتب والمعاتب حيلتي ما شقق ثيابك

سوالف طعنتك مع حرقتك ما خلت ثيابي


ادور للفرج مفتاح يطعن قفلة ابوابك

اثاري فالبعد مغلاق قفلك فتّح ابوابي


سريت الليل قبل الصبح ما يشرق على ما بك

قبل ما انكسر قدام عينك وانفضح ما بي


على الله يمتحي ممشى القدم من صفحة ترابك

إلين ألقى حروفي طابعة في صفحة ترابي