مساكم الله بالخير
يابو عوز ياللي هلك تملك من الراحه صفر
بانت علامات التعب بوجيهها وعروقها
وسط الحياه القاسيه ذبلت امانيها زهر
كن الفرح ماهوب حق ن من بسيط حقوقها
كم حلم مات وكم خفوق ن عثت به ذل وقهر
وكم من رجل له حاجة ن عزت عليه يسوقها
واليا عشق له بالسما نجمه على اطراف القمر
لاهو قدر يدفع مهرها ولا تهون يبوقها
يمد كفه للثريا فكل ليله بكل شهر
ويبات ماطال الثريا لو سكن معلوقها
الله عليك ومالنا منك بهالدنيا عذر
وانته وسط دم الحياه اللي بكانا موقها
يابو عوز حملك ثقيل وقاسي يقص الظهر
وانا مثل باقي هلك..عوقي يشابه عوقها
كم لي ادور بين شوكك والحصى عنك مفر
حتى جرحت ايدي وطاحت دمعتي من فوقها
لعيون بنت ن قدرها كل ما الزمن يمضي..كبر
حتى نمت بين الحنايا واثمر ن عذوقها
لعيون بنت ن لجلها روحي اقدمها مهر
مااملك سوى هذي..وهذي ماغناني سوقها
لما بغيت اضمها لصدري على حد الطهر
واقدع من الفرحه وانا اللي ماقدرت اذوقها
الله يعوضنا ويجزا كل من ضاق وصبر
خير..ويهون عالقلوب اللي ذبحها شوقها