مراسله شعرية
بيني وبين الشاعر احمد بن راشد السوطي
عامر
اول مقالي بإسم ربي باديا == لي ثبّت الأرض ابرواسي ماكنه
وبتحيّة الإسلام بديت سلاميا == يامن حضر انثر سلامي واعلنه
سير يارسولي عانياً متعنّيا == ووصل الى احمد فـ داره ومسكنه
واحمل كتابي مباركاً ومهنّيا == لاتهاب من ظلمة ليالي الداكنه
له إحترامن عندي وقدره عاليا == ومعزّته في وسط قلبي كامنه
مثل الذهب قدره ثمين وغاليا == بين المعادن ميزته متبرهنه
من غير مـ ادري ولاحدّن طراليا == شفت الأسامي في الصحايف معلنه
من شدّة الفرحه نظمت امثاليا == في شف اصحاب العقول الكاهنه
بالخير والتوفيق ادعوا إلاهيا == بالمنصب العالي تفوز وتضمنه
ارجوا السماحة منّكم واسمح ليا == ماقدرت اوصل في الظروف الراهنه
ايام مرّت والشهور تواليا == على غيبتك مرّت سنين وازمنه
وسألت عنك ايام ولياليا == فتشت عنك في جميع الأمكنه
يثير القلاقل ابتعادك عنيا == من غير اسباب وادلّه بيّنه
لوكنت تقطن في مكانن نائيا == طرواك دايم في جميع الألسنه
اطلب من الباري تكون معافيا == والله يجنّبنا العلوم المحزنه
والختم صلوا على ختام الأنبيا == يشفع لكم من حر نارن ساخنه
احمد
سميت بك يارب كل الأوليا == واحد احد عظيم قوّة وهيمنه
نزّل على عباده بشكال الحيا == غيثن تسلسل من سحابه وامزنه
اهلا برسالة اهل طيبه واسخيا == يلّي مروّتهم فـ قلبي ساكنه
حسن المعاني ماكتابة أغبيا == ولا مـ القرايض منقوله ومدوّنه
كلّفت نفسك ياعامر تعب وعيا == في مبعث التهاني ذهنك تمحنه
ودراستك في النيل قاري وفـ الضيا == قولن مهذّب وقوافي موازنه
تشبه فهامة بن مقله وبن برخيا == لي صيتهم واصل جميع الأمكنه
ومثله الذي دارس مريكا وروسيا == خرّيج الجامعه وعيونه فاطنه
فايق على سكنة قريات وصيا == ولطافتك حالي حشيمه وزاينه
وياصاحبي لنتوه لنا نور وضيا == لن خانت الدنيا وظروف الأزمنه
انا معهّدنّك ماتحمل حقد و ريا == ربيعن حالنصاحه قلبك مـ احسنه
يجزيك الله لي يجازي الأزكيا == تستاهل ياصحيبي خير وميمنه
من بونكم يوم النوايب اوفيا == اهل اللطافه وعقولن متكهّنه
تمنّيت لك تصبح ولي في آسيا == رتبه رفيعه مضمونه ومأمّنه
وكل صابرن يضفر بحظ الأصفيا == حدّن تذلّه سلمى وحدّ تمكّنه
ماسمعت عنه يوم صابر أوريا == عقب الصبر جنان الخلد مواطنه
واختم مثالي بمن يشفع حالأشقيا == لي ناصرالدين الحنيف وحصّنه
وكذا الصحابه واهل بيته الأتقيا == نسل المعزّه وابطالن ميامنه