[عمار الخروصي]

مونولوج داخلي لشاعر فقد ذاكرته ، وتذكر القصيدة !
************************

منهو أنا ..؟
من وين جيت..؟
أي ذاكرة ممسوخة كانت تسكن بروح الطفولة شكلتني ..؟
وليه دائم هالجسد مستغرب أطرافه القديمه.. ؟


آنا الغريب مني /آنا البعيد عني


متجمدٍ هالوقت
لا عقارب تلدغه ..!
ميتٍ هالموت
في حياتي الفارغه
إلا من هذا العجوز
مدري أبوي هذا ..
أو ربي ..
أو هو نبي من عصر مستأصل من التاريخ
أي زماااااااان اللي أعيشه خارج ْحدود الزمان
في هالمكان محشور
لا ريحة حليب أمي
ولا صياح أطفال
ولا صباح الخير
ولا مساء النور
ما غير صوت الذئب
لا من عواء دمي وسااااال

زحمة وجوه
وفراغ أسماء
في كهف –يتعنكب- على الضلمى

منهو أنا.. ؟
وش هو تعريف الجنون ..؟
وش هو تعريب الحزن ..؟
لا جوابات أفتراضيه لمنفى واحد ٍ مسحور مثلي !
(والوطن فكرة!!)


لا احتياجات أعتراضيه لمنفي غائبٍ مغصوب مثلي!
(والوطن نكرة!!)







أشعر أبواب البيوت
اللي يفتحها هواي
أريد أتقمّص شبيهي !
قبل لا أولد هنا
من غير أناي ..


آآخ من هذا العجوز
من أي نجمٍ منطفي جيت ؟

وليه انت دائم حزين
وفوضويّ
ومرتبك
ومنهمك
في وعينا بالاوعي..؟!!
وليه تلعن لي هلي !
من هم هلي ؟
وأنت طيب ..
بس قل من هم هلي؟

مُتعب ومُنهك وطيّب هالعجوز؟
الساحر/المخدوع
اللي أمتلى باجسادنا والجوع !
الساحر/ المخلوع من ظله !
الليلة –يتوحمّ- بطفله !
ما لفحتها الشمس بعد
ولانظرت خارج كهفنا من زمن يوم أحبلت فيها مرأة من وادي العقبان!

هوام الليل
تحرس فتحة الكهف
الزمن به صفر !
الغياب إنسان ياكل من اظافر إيده المشلوله!






وانا مُعلق بين ما صخرة وجحر !!
واشْعر بريح من فراغ تمرني
واطيح في جُب إحتظار الاسئلة !
منهو أنا يا يا
يا أنا ؟
متى أختفى ظلي ومُتّ؟
كيف إندفنت؟
وكيف جيت لكهف هذا الإنتظار ولا أثر للقبر
ولاتراب ولاحديث أتذكّره لأهلي وااحبابي و أصحابي!!


يا هل ترى
لي أم هي تبكي عليّ كل ليل
لي إبن هو يذكرني لاصحابه
من وين أنا وفي وين ؟

الساحر أتوضاء بدم الطفله وقام الصلاة
خلفه ثلاثة كني واحد شفته في حلم ٍ قديم !!
نفس الاصابع ناقص الإبهام في ايده الشمال
وأعوّر بعينه الشمال
وأعرج برجله الشمال
ْحلمته يلحقني بجمل
لين حاصرني بجبل !!
هو ما غيره النــ............ !!
مثل الخيال
ليته خيال !!
متى ينتهي

*****
هالليلة ؟؟؟!!