[إبراهيم بني عرابة]

السلام عليكم و رحمة الله و بركاته

من الأرشيف المتواضع.. شخبطات كتبتها على لسان صديق لي فقد من يحب..

.
.
.

حبي الخالد


كسى ذاك الحداد ربوع
سقى حرّة ظماها دموع
بعد فرقاك يا خلّي
بخفّاقي الحزن مجموع

ولكن وش يفيد البوح
ترى مــ يْرد روحك نوح
وحان الوقت أستاذن
قبل جفن الظلام يروع

أبستاذن حبيب الروح
بدى ليلي يهدّ صروح
و اجيلك أشتكى بكره
وفيني خافق (ن) موجوع

"أجيلك والهموم جبال
اجيلك والدموع ثقال
وفيني جرح ما يرحم
وشوق(ن) مــ احْتوته ظلوع

أبرحل والدمع دلاّل
و حالي ما بعدها حال
أبرحل والجرح ينزف
واجيلك بالوفى والطّوع

وأحكيلك ولو مرّة
أطفّي الضيق والحرّة
أحاول بسّ أتصنـّع
وأدري خافقي مخدوع

"بدنيا ما بها دونك
أبد ناس(ن) يساوونك
حسافه الوقت فرّقنا
وشرّبني شقا ودموع

أنا وشلون بنساها
مشاعر أمس عشناها
إلي كل(ن) مضى بدربه
و غدى حبل اللقا مقطوع

وتوني الحين أتألّم
وفيني جرح يتكلّم
بعد ما رحت يا سيدي
غدى ثوب الفرح مخلوع

ترى قالوا العمر يومين
وما صدقتهم يا زين
وفجأه غبت عن عيني
برحله ما بعدها رجوع

رحلت و ما بقالي شي
وإنت الزاد ويّا المي
وعساني بعدما ولّيت
أموت من الظما و الجوع

شسوّي بالعمر دونك
ونا كلّي فدى عيونك
حياتي ما لها معنى
بدونك حسناها منزوع...

بدونك ضاعت الحيله
أنا قلبي شسوّيله
سهير(ن) ما ينام الليل
وينطر جيّتك بخشوع..

يحنّ وتقتله الحيره
ذهول(ن) صعب تفسيره
ويصرخ وسط صمت الليل
بصوت(ن) ما بقى مسموع...

و رغْم انـّي تعبت وضعت
أنا للحب لا ما بعت
بعدني بعيد ميلادك
أضوّي بالديار شموع...

وأخفي الشوق في صدري
وناره فــ الحشا توري
وإنت ادرى أنا وشلون
هــِ نفسي مْن البعاد تلوع

بعد فرقاك ضاق الكون
حياتي ما لها أي لون
مثل ورد(ن) ذبل عوده
أبد ما له ورق وفروع ...

و لجـِل عينك أنا جيتك
أبشرح ليه حّبيتك
أبي أوقف على الذكرى
ودمعي يشرح الموضوع ..

على الذكرى وقفت اشكي
على الذكرى وقفت ابكي
بليل(ن) طال في صمته
وشمس(ن) ما رضت بطلوع ..

ويبقى الجرح ماله حل
و جا وقتي عشان ارحل
وابيك الحين تعذرني
أبرحل والقلم مرفوع ..

صحيح الجرح ما يلتمّ
بس مابيك انا تهتمّ
ولابي ثورة احزاني
تصير لحكمها مخضوع..

أبستاذن يــ روح الروح
حزين وتايه ومجروح
اّحسّ الوقت يسرقنا
وقلبي مْن الحشا منزوع...

أبستاذن بدون دموع
بدا ليلي يهدّ ربوع
وذا فكـّر يجي بكره
بجيلك والقلب موجوع


حكاية حبّي الخالد حكاية مــ احتوتها سطور
وحلم(ن) بات في عيني على رمش الغلا شلته

حكاية في وسط قلبي نقشها أبيض الطبشور
بقت وسط الحشا تذكار للّي ما تخيلته

ألا يالله على حب(ن) يبدد لوعة الديجور
مشاعر عاشها قلبي وباتت في مخليته

أنا لا جيت أوصفها تفجّر بالقصيد بحور
وسال الدمع من عيني على حب(ن) أنا عشته

حبيبي اللي وفا بوعده بنا وسط الحنايا قصور
خذاني بطبعه الوافي وْ أسرني وسط مملكته

حبيب(ن) لا ذكرت اسمه ضوى وسط الزوايا نور
رغم سود الظلام اللي بعد موته تكبدته

حزينة الروح بغيابه ونا في صمتها مكسور
أباري لوعة احساسي بشوق(ن) ما تحملته

بشوقي للعزيز اللي رحل عن ناظري مجبور
وخلّى خافقي تايه وتكثر دوم اسألته

سقاني ودّه وعطفه وصرت بعالمه مأسور
تضيق الدنيا في عيني إذا مر يوم ما شفته

خذاه الموت عن عيني وبنى بيني وبينه سور
وقلبي من رحل ياما كواه الضيق في صمته

حبيبي يا دوا جرحي وفيت وما عليك قصور
ولجلك حبك الوافي أبد والله ما بعته

أنا باقي على وعدي وربي يعلم المستور
مدامك حبي الخالد وسيدي اللي أنا اخترته

أنا باقي على حبّك وأدري هالزمان يدور
ومهما دار وتحوّل.. خفوقي بس يبيك انته

بكيتك دوم في شعري وزينت القوافي البور
حروف(ن) عالورق تبكي وحزن(ن) ما تعوّدته

وألقي هالقصيدة بمسرح الإحساس دون حظور
قصيدة حبرها دمعي وشوق(ن) متعب(ن) كبته

حكاية حبّي الخالد بقت في دفتري دستور
وسيدي من رحل عني أبد والله ما خنته

أحبه وحبنا خالد.. وقدره ما احتوته سطور
ودامه حبنا وافي.. على رمش الغلا شلته