بسم الله الرحمن الرحيم
اخواني شعراء وشاعرات
ادارة ومشرفين
مرتادي هذا البيت الادبي الكبير
يشرفني ان اضع بين ايديكم هذه الابيات البسيطة معبرا فيها عن واقع مرير نعيشه...
والادهى والامر ان من اكل من خيرات هذاالبلد المعطاء هم من يتجرؤون بالتخلي عنه والمساومة عليه...
يــــــــا قسمة الله وين هالحظ مخشوش
مــــر الزمـــــــان مكشرات ن سنــــانه
جاعت كروش وبالطمع شبعت كروش
هذا عديـــــم وذاك ف ارقى مكـــــــانه
فقير قـــــــام من الفجر ماسك بـروش
صـــــــاحي ضمير وما يخون الامـانه
مسكين يشقى للمســــا يجمع قـروش
وهذا تجيه قروش جـالس مكــــــــانه
محتـــــاج..لابس بالقناعـات طربوش
مرفوع راســــــه مـا انحنى للاهانه
تلقى التواضع في خطــاويه مفروش
بين البشر معــروف قدره وشـــــانه
من هيبته يســـوى ملايين و جيـوش
فـــي كفة الميزان رجحت اوزانـــــه
لجل الوطن يدفع هدب عين ورموش
افعـــال تشهد له ترى مو لســــــــانه
من فزعته تفزع له جبــال و وحوش
ضرغــــام في وجه العدا والخيانــــة
واللي جمع ماله عن الخير مربوش
كنه اخذ عن يوم مــوته ضمــــــــانه
لاهي ولا لحظــات تلقــــــاه مبشوش
مشغـــول باله كيف يكسب رهـــــانه
عادي يجيه المال لو كان مغشوش
من وين ما اقبل فرش له ثبـــــــانه
زين قصوره بالزخارف و ل نقوش
وان جاه سائل ما حسن له ب عانه
ناسٍ قنوعه ضمها بويت مع حوش
وناسٍ غرفها كنّها وسع حـــــــانه
لو ساومونه في الوطن قام منعوش
باعه بدراهم بخس /عابه وشـــــانه
يا قسمة الله لا متى الحظ مخشوش
اخاف يسحتنا الترف والخيـــــــانة
ثبانه......كلمه عامية ويقصد بها الثوب حين يفرش لجمع شي مثل المال
عانه.....عمله هنديه قديمه
حانه.....البار او مكان شرب الخمر وعادة ما يكون ذا وسع ورحابه