[سالم سعيد المحيجري]

محاورة عن طريق الهاتف

بين ماجد الداودي وسالم المحيجري

16/3/2014

قال ماجد


سلام الله عليكم ف اليوم الجديد ..
ايام كلها دائرة و متجدده ..
يامن حضر ببدع لكم صوغا فريد..
فضة وتبر غالي صوغه وفرده


سالم


حيا بسلامن طعمته سكر حديد
سكر ونوعه من صناعه الجيدة
فرج علومك ومن علمكم نستفيد
والعسكري ينفذ أوامر سيده

ماجد


مشي علوما حادثة وعنها نجيد..
إلا مطر قالوا فسيوح سنده ..
عني وعنك هالمثل عنى بعيد ..
عني قليل وانته المسافة المبعده


سالم


الشكر لله خالقي ربي الوحيد
والأمر بيده ربنا لي ننشده
والمنخفض ماجد يقولولي شديد
وأرصادنا كل المواطن ترشده


ماجد


شرطة عمان تناصح والرادو يزيد .
آها الحذر من كل مجاري زايدة .
وادي محضة نازل وكذاك اللبيد ..
وكذا يقولوا نازل وادي الرشاشدة ..


سالم


الله يدومه صاحب الحكمة الرشيد
الي حكمها بالإدارة الجيدة
وأما الحذر واجب علينا بالبديد
كل ديره عاشت فخير ومسعده


ماجد


أدعيت له بالصحة والعمر المديد.
قايد ومن مثله لزوم نمجده
صور العفية تنتظر خير البديد
يارب غثها بالمخيلة وفايدة


سالم


الخير قادم والخبر ذاعوا أكيد
فطيوي قالوا برق يتبع مرعده
وبلادنا خيراتها عند المجيد
يلي يقدر للطقس حن نحمده


ماجد


لي مخبرني عنها سالم بن حميد .
قالي فطيوي عندهم اجواء بارده ..
ونحن كذلك لي عندنا شرتى البريد ..
من ديارنا سناف وعده تشهده


سالم


من ساحل العيجية لين جبل حفيد
كل الشوارع والمراكز جاهده
تبغى الأمن والأمن همه بن سعيد
الدار وحدة والأماني واعده

ماجد
صوغك عجبني ويشبه صيغة بن وديد..
صوغا مصفد من جواهر عسجده .
أبغى السماحة م الجماعة والعجيد .
فوداعة الله واللقاء بنجدده



تمت