[جمعه المخمري]

--------------------------------------------------------------------------------

أشقيت روحي وأثقلتني المشاوير
والدرب أعسم مايلين أعوجاجه
دربن إذا به جرف عافه على الخير
مالك تدوس أخطاه أدناة حاجه
شايف بنفسك دوم تفرق عن الغير
كمل مسيرك وقت فاقد.. سراجه
ماتت بي الدنيا وأنا توني صغير
أروي الفرات اللي تناسي أجاجه
وقلبي غدا لعبه بّيد المقادير
تهب الرياح تفج والبحر ماجه
لي عين كانت ماطره بالتعابير
فيها برائه عكس ذيك السماجه
شفني تعبت من كثر ماحل وآطير
آدّور لعمري سنين إبتهاجه
وش باقين لي بيه قطع المقافير
سراب يلمض بالضمى بإمتعاجه
في كتف لوح أرهقته المسامير
تبغي تودء ده لانوى بارتجاجه
لي قصةٍ تشبه أنين العصافير
عافت تغرد لا إجزعتها السفاجه
بي ناطحات هموم ظنونٍ معاثير
وفي داخلي بحرن من الضيق فاجه
لوقلت أواجه حظ عمري بتدبير
شلي لأجله أو بقى فيني أواجه؟
هذاك دمعي لي جرى بالمغازير
وهذا خفوقي مشتقي من سياجه
حزن وفرح متخالطن بالتصاوير
وصبرن قديم ثار وابدى إحتجاجه
مايحكم الثار ..الا (سالم الزير)
فيه حسٍ بالألم ..زاد إختلاجه
جسّاس علق حربته بصاحب العير
وخــلاه دمّــه مسبلٍ.. بانتهاجه
أطلبه ثاري لو حقوقي مطامير
إمن الذي عذب خفوقي وشاجه
البارح اللي قد مضى وقت العصير
لو هو تكدر عاد يحمل رواجه
مجحم ينبل في الحشا كل تأثير
صافج وناعج مزبدن في عجاجه
الحكمة اللي مالها أي تفسير
شبه الفراغ اللي بوسط الزجاجه
خذلك من الفسحة إحتياط وتحاذير
الذيب يسطي على الراعي ونعاجه
يعقب على سيح الضمى جامح الطير
ويــلّتــف ظنن مايلٍ.. بــازدواجه
إن شفت همي في عيوني طوابير
راقب شموخي لا نوى في هياجه
إن كان لي ناسن على الضحكة تصير
لي ناس ترقى وعلى القلب تــاجه
أموت صقرن لااغدرتني الشحارير
ولاعيش دهرن خايفن كالدجاجه
ياهيه وقف بالشّمت نفخ المزامير
ساحل غرامك ..عافه اليوم عاجه
وش لك بقلبن كان ينبض على الخير
تكــفاه خــلّه.. البــــعد عنك عــلاجه



السماجة.. تعني القبح
السفاجة..اقصد فيها الاصوات المزعجة

فاجِه..واسع ومرتفع

اختلاجه.. اختلاط وتداخل

العِير.. النوق او الابل

مطامير..مدفونه

شاجَه.. شاج..غّلظ

مجحم..قدم بقوة

ينّبل..يصّوب

صافج..يستمع بحذر

ناعِج.. اقصد فيها يقظ

وبالطبع هذي من ناحية المعاني اللي اقصدها في القصيدة