وجه
* القصيدة الفائزة بالمركز الأول في مجال الشعر الشعبي
قبْل مَا ظلي يأذِّن للغروب
من يبادلني الكلام
وْيفتَحِ لخوفي مَنَافذ للهرووووب ؟!
في الحناجر اغنياتٍ تكرَهِ القضبان
واخْتارت تموووت !
ليتها كانت نخيل
وعلمتني الصبْر في عزِّ الجفاف
منطوي
هذا انا ؟!
مني اخاف
في الْمدى شارد وحيد
لاصَدَى
مِثْل الكراسي اللي امامي
وْما اقول إنِّي حزين !!
من وشى للريح عن حلمي وَبَابي؟!
وْعن سراج ٍ كان يحْرسني مِنِ سْيوف الظلام ؟!
يا أناي :
لا تداكي تعبَكَ بْهذي البيوت
الظلال توحَّشَت صارت رماح
يمكن الليله يمرَّك الف صوت
والف وجه يجيب في قلبك جراح
دير ظهْرك ابلغ الصَّدْق / السكوت
كلَّ طير ٍ تطلقه للريح طاح !!
علقَتني الأرْض في سقف السما وْقالت لِيَ ارْحل
وْما بقى لي من جناح
لجْلَ أعوَّد
أو أطير
من يفكَّ قيودَهَا من معْصمي ؟!
آنا جسَد عاري وكلي أرتجف
مخذول حتى من دمِي
دشداشتي ملت عظامي للأسف
واختارت الرَّيح !
وْرغم هذا
كل َّ شي بْخير لكن :
عابس ٍ مثل الشواطي اللي تفارقها النوارس
مالها إلا تمني رْمالها بْسرب ٍ جديد
الحياة اشْبه بزنزانه عليها الموت حارس
والزمن شمْس وْسنين العمْر قطعه من جليد
وْلاظِلال
طاحَتَ أوراقي
وَمِن يحكي لها الاوراق عن حزْن الشجَرْ؟!
كيف السقوطِ يْعرِّي الاغصان من كل الملامح
هذا وجْهي
ولاَّ وجْه
الانْكسااااااااار؟!
صرت ارمِّم في صميم الذات لاحْزاني بلاد
وْيمكن الليله
أعير البرْد معْطف من سهاد
وين أفتشني عليَّ؟!
الزمن اقْدام والرحلة تعَب والدرْب وين؟!
من تداعى العمْر طاح الحظ َّمن عالي سماه
كلَّ ماشفت المرايا سال من عيني الحنين
شفْتنِي ..كهْل ٍ ضريروْتخْذَله حتى عصاه
من أنا ؟ هذا الضعيف اللي يخاتْلْه الإنين
أو أنا أسم ٍ غريب ٍ خانَته كلِّ الشفاه
باقي ٍ مزروع في حارة قديمه وْبيت طين
مخْتِنقْ ..طارت كفوفي للسَّما بآخر صلاه
جيت امدِّ لحلمِي الأعمى فضا واهْديه عين
لكن الايام خانت ..والحلم ضيع فضاه
من يعلق صورتي لو غبْت ع جْدار السنين؟!
وْمن يغنِّيني قصيدة خالده بْفمِّ الحياه؟!
لو لهَا البيبان صُوتِ يْحاكي الصمَّت الدفين
ما نَبَتْ في هذي الجدران وجْهِ يْصيح آه!
عبدالعزيز العميري