[حميد محمد السالمي]

أسري على الدرب البعيده بلا ليت
ع موترٍ درب الوعر ما يرده

مفنود في صنعه وشرواه ما ريت
يتحّمل حمول الثقل والمكده

صنع الثمانينات من نوع وانيت
مورده بهوان ما فيه قده

ما فيه سيدي أو مسجل وكاسيت
من يستمع نغمات صوته تسده

الله يرحم صانعه حي أو ميت
ويجعله ف الجنه لجاه و مرده

أطرب إلى سيته إذا القنص أنويت
في خايعٍ نفسي تباه وتوده

بديرتتٍ تزهي بكثر المنابيت
ما تستمع فيها لصوت المعده

أشيل سكتوني وأحطه على السيت
لي ما يخلف الضن ساعة تمده

صنع السويدن عالي القدر و الصيت
يثبت ولاهوب الهواء ما يحده

و من الرجال الي لهم قدر خاويت
عندي لهم كثر الغلا والموده

ما أهاب ربعتهم ولا يوم حاتيت
ألهم عن الزلات نفسٍ مصدّه

ما قربوا بيت الرقص والحوانيت
ولا صبّحوا لين الضحى ع المخده

ربعي وأنا الي مثلهم قد تمنيت
وكل واحدٍ م الناس يختار نده

أدعي الله كل ما أصبحت وأمسيت
الي يقصر العمر بيده ويمده

يغفر لي الزلات ان كنت أخطيت
وباب الشقا والهم عنّي يسده

حميد محمد السالمي