[خالد الحمداني]

19- حمام الدوح
حمام الدوح لي من فوق غصن البان نوّاحي
أنا مثلك أرد النوح تحت اظْليلة الدوحي(1)
حمام الدوح مالتّجريح بسّك .. عاد بتْواحي
تكرّم لحظتن فيها أداوي فالهوى روحي
بتتْلفني إذا ما كنت في غدوي ومرواحي
تهيّض ليعتي كل ما غديت وْكلّ متْروحي(2)
عليْ والدهر ما هيّد حرقه الورد بافْراحي
علامك وانْت لك أزمان تلهمني ولي توحي
خسيس الجار لبْريشه يدق عوْتار لجراحي
ويتلمّس كما العميان إذا شي باب مفتوحي
ونا حاشم جواري منك طاوي عنّك اجْناحي
فلا ترمي لذي لو هو رمى حدّك علنْزوحي(3)
كفى ديجور يتغشّم عليّه لين مصباحي
تخافت فالسّهر نوره ولا ستّر على بوحي
على ويش الشّماته قول من فالنّاس مرتاحي
إذا كل واحدن في داخله كم طير مذبوحي
ترحّل عن غصون البان خلّيني أنا وْراحي
ولو من سكرتي بعضه على لثياب منضوحي(4)
ألا ياطير لي طيرن ذبحته ذبح سفّاحي
تعبني أغسله في ساح جرمي بالدّمع نوحي
تبسّامه وبصماته وطيفه لا يزل صاحي
ونا حاول خلاصي من زمن ممساي واصْبوحي
حبيبن كنت له بستان هو ورده ولاقاحي
ولكنه قلع نفسه مسبّب دامي اجروحي
وكنّا لو يسدّ الضيق بابن كان مفتاحي
ودونه محكمن بابي ولا مدخال لصروحي
لويش اللي نحبّه من عتاق الخيل جمّاحي
متى يسرج ويا زينه إذا هو كان مسروحي
لويش العطر ما يجمع اذا ما صار فوّاحي
ولو هو كان محبوس الزّجاجه عام ميفوحي
حبيبي أسْمحك يا غر أيا مملوك لوشاحي
حبيّب والغدر منّك تقبّلته ومسموحي
أبجمع من عقب لشيا وخلّك للوقت صاحي
وخلّك للحمام اللي سكن فالدّوح ممدوحي
عسى ليّام خوخن والعنب عشرن وتفّاحي
وتصبح عازّهر والفل أيا غرشوب وتْروحي
مودّع للهوى واهْله ونا مقتول برْماحي
وداعن من غريبن ساب درب الشوق يا روحي

1- الدوح : من الدوحه وهي الشجره العظيمه المتشعّبه .
2- غدوي : أي ذهابي المبكر . مرواحي : أي عودتي متأخّر .
3- علنْزوحي : أي على النزوح .
4- راحي : خمرتي .