[حسان الحوسني]

القصيدة إهداء إلى الأحبة في معهد العلوم الإسلامية

مشاعرنا سوالفنا وصحبتنا وليالينا
حكاوينا تشدّك للسمر معنا طرب فيها

ظروفك يا دراسة جمعتنا في كراسينا
وبسمك تنفتح أجمل رواية شعري بيرثيها

حكت عنّا وعن قصّة رباعتنا وحكاوينا
حكت قصة وفى قصّة صدق محدٍ بيخفيها

تدور أحداثها في معهدٍ عنده تخاوينا
ممرّاته تسجّل للدهر صحبة يداريها

بدون المعرفة عن بعضنا حنّا تلاقينا
وصرنا للصداقه سالفة الكلّ يرويها

نعم كنّا ولا زلنا لعشرتنا مثل مينا
سفينتنا بعزّة نفسنا ينزل شراعيها

توحّدنا على الصعب وسعادتنا تنادينا
وبالفرحة روابطنا ترا محدٍ يضاهيها

تعاهدنا على كلمة تسطّرها أيادينا
صداقتنا ابد ما تنكسر هالة رواسيها

وفي ضرح السكن إخبالنا حدّت بلاوينا
مجانينٍ بعفويّة تحلّت في مباديها

وبالمعهد سوالف تبهرك منها تعزوينا
نسوّيها ويخرجها لنا معلم يحاكيها

تكاتفنا عقب يومٍ صقل إلنا مآسينا
وطاحت دمعةٍ تروي لكم مأساه تبكيها

تباعدنا وذكرانا نجم ضوئه يودّينا
أبنثر من ربابة بعدنا غنوة واغنّيها

هبوب الذكريات الباقية نفحة تواسينا
مثل قرية تربّينا وسط نسمة ضواحيها

وإذا هبّت لنا الذكرى لفرقانا تباكينا
وما غير اللقى لجروحنا بلسم يداويها

توادعنا ويا ليت الموادع ما تجي فينا
علامك يا زمن كلّ المحاسن ما تخلّيها؟!