نشرة مباشر
مشاكاة للشاعر أبو سامي
جاتك أبو سامي تماثيل لشعار
من شاعرٍ يرزف (ف) صف الكتابه
من بو محمد يذرف الدمع مدرار
يصعب (ع) نفسه شوف دمع الصبابه
يا الشاعر اللي في اللوازيم مغوار
يا من تذل الصعب وتفك بابه
وآنا عنيت اليوم صوبك ومحتار
والحب يعزف في فوادي ربابه
اتْشابهت عندي يميني وليسار
من زود مابي من هموم الكآبه
من بعد خلٍ في الفضاءات طيّار
مدري تغلي أو عذولٍ دهى به
ليته يبيّن ما حصل لهْ وما صار
والخل يقبل من خليله عتابه
قفّت علومه من دروبي وقد جار
والقلب واقف فوق تلة سرابه
العين جفت من دموعي ومنهار
والبعد أشعل في ضلوعي شهابه
هذي أبو سامي عناوين لخبار
"نشرة مباشر" والخبر في صوابه
حلل علومي والصدق فيك مسيار
يامن تذل الصعب وتفك بابه
عبدالله بن خزام المعمري