[محمود النبهاني]

يُوم انا تْمَشيت إبْسوق لِبلاد
شِفت أشيا بالبَلدْ والله عجيبة

خبِّروني وش جرى بالناس يـَ عباد
صارت الدنيا سوالفها غريبة

شفت قصات الشعر إتْزيد اعداد
كِلِ قصَة تنتهي بنظرة معيبة

وهذا واحد ماشيٍ إبغير معتاد
مشيةِ بْنية أو شوية قريبة

وهذا واقف ينتظر منشان يصطاد
يرتجي بنوتةٍ حلوة تجيبه

جهز إبلوتوث مع كل لِعتاد
وحط رقمه مع عباره مستطيبة

وهذا ماخذْ معْ بنات الناس ميعاد
كل وحدة يدِّعي إنْها الحبيبة

يدعي وصله وما ينوي البَعاد
ومن شبع منها رماها بالمصيبة

مادرى ان المشاعر صعبِ تِنعاد
وإِنَها بتكون في حالة صعيبة

لي نصحنا اوصفونا بطبعِ حِساد
والحسد فينا يعاند كلِ طيبة

أسهروا بالليل في لعب واعياد
من يأذِّن للفَجِر محدٍ يِجيبه

ذا شباب اليوم ماكنهم أولاد
كل واحد ماعرف باللي يصيبه