في وقت متأخر من ليلة الأمس وصل خبر لأحد أصدقائي عن وفاة احد أحبائه ولكن نظرا لبقائنا في السكن الداخلي لم يصله الخبر الا بعد يومين وجاء يشكي همه ...
رحم الله أموات المسلمين وأصبر أهلهم على فقدانهم..
يا صاحبي يلّي عـن الوصل مبتور
وإنـتـه تغـادر مـن ديارك بإصرار
طالب علوم المعرفة بين السطور
شدّيت حيلك بالعزم سرّ وإجـهــار
وتركت خلفك أهل وأحباب وشعور
تركت خلفك بيت وأشجار وأسرار
والبارحة وصلتك أحزان وخبور
تروي خبر مازن على الجمر والنار
حارت هواجيسك وأفكارك تثور
والحزن غطّى هامتك بين الأقدار
وأنصيت صوبي تشتكي همّ منثور
وتقول لي ماني مصدق هالأخبار
وشلون يرحل والعمر عمر الزهور
وشلون نفقد من تلاعبه الأزهار
توّه صغيرٍ ع الدفن وسط القبور
توّه تخرّج والعمل صار مدرار
يا ما وعدني والوعد منه مقدور
يا ما ترافقنا بطلعات وأسهار
بالله يا دنيا علامك بلا دور
ليه العمر ما فيه أحكام وأدوار
وقلت يكفي يا عوض انت مقهور
لا تجعل الفرقى مدامع وتذكار
وإدعو لربّك بالدجى وانت مبهور
يالله رجيتك ترحمه وانت غفّار
يالله عسى تجمع حزينين الصدور
بجنان خلدٍ سكّنت كل الأبرار
كلمات :
حسان الحوسني