[منذرالفطيسي]

المشاركة الأصلية كتبت بواسطة فاطمة الكعبي

لأكون هنا بعد غياب
وليقيني بأن هنا قلوب بيضاء..
كان لا بد أن أحضر مع "دندنة على أوتار الروح"
وهي ليست إلا بعضاً من ذاتي - أقصد بعضاً من كتاباتي-
فـــ لكم هي..

/////////

(1)
تعوّد

تعودنا نشوف الحلــم واقف بآخر الطابور
ونظراته علــى اول طريــقٍ ساكنٍٍ فينا

تعودنا على جمــر الضلوع الناحلات البور
تشبّ أكبادنا جــوع الحيــاة ومـا تطفينا.

(2)
وُحدة

على كثر البشر حولي أحس إني وحيدة حيل
واحس بشي ناقصني/ وانا أملك كثير أشياء

وعلى كبر النهار اللي يطوقني/أشوف الليل
يحاصر سكة اوهامي ملامح ملّها الإعياء

(3)
خيانة

غريبة/
حتى هالسواقي تخون..!!
تصرخ فوجه التراب
إن بخلت وما عطيتك/
وش تصير؟؟
غير أرضٍ قاحلة
متساءلة
أرضٍ يباب
مــ حضنت إلا السؤال :
ليه طيب هالسواقي تخون؟؟!!
::
::

يالسواقي وش جنيتي غير موت الياسمين؟؟
........................جاوبيني كــان لدموعـك حـروف وفهميني

ليه ندفن في عروشك من عطشنا حاجتين:
........................حاجة ما تروي ضمانا وحاجة ملّتها سنيني؟؟

(4)
عيب

تجي تصرخ فوجهي ما درت عن حاجتي للفلس
وانا أتراجع بخطـوات ذلّـي وألعــن الحاجة

إذا كان الفقر عيبـي/ ترا أكبـر عيوب النفس
تشوف إنسان يقتات الظلام وتطفــي سراجة

(5)
ضياع

من ذاكرة دم الشوارع يرتوي مليـون جرح
ومن حزن أعوامي تخط الذاكرة لحظة وداع

ما جبتها إلا لنفسي وآنا أبنـي الحلم صرح
ومـا جبتها إلا وانا ازرع حقولـي للضياع

(6)
عطش

(عطشانتـك)...والليل مـا فكّر ينام..
طوّل.. وانا أرقب رجوعك واحترق

(عطشانتك)..والصبح يعـزف لليمام
معزوفة غيابـك وانـا كلـّي أرق

في داخلي تضمـى سنينك عام/عام
وفـي داخلك تتناثـر أشلائي ورق

(7)
بعثرة

بنيت لك "دولة حنين" بداخلي وبعثرت أشيائك وراي

...................................حتى أنا بعثرتني من ضمن أشيائك وانا لك أنتمي..!!

(8)
طهر

(ثلاثنيني) بدت تشرق وانا في داخلـي طفلة
حواها كل طهر الأرض/ لكن طهرها كاذب

تلاعب هالأماني لجـل تعطي للفـرح مهلة
وتخذلها أمانيهـا وتتحـول/ (وجه شاحب)

كساه الليـل سندس هيبتــه وتكوّنت جملة:
(أنا طفلة وحيدة ما لها في هالوطن صاحب)

(9)
كذب

عفوا أكذب..ما فرحت..!!
كيف أبفرح والأمل شيخٍ ضرير؟؟
مر في دربي وغادر
وما عرف للدرب آخر
بس يمم شطر أحزانه وسافر!!

(10)
حنين

حنين..ويكبر فصدري وطـن يتكحل بطهرك
يعانق شيطنة روحـي إذا مـ تعلقت باشياك

دخونك/دفترك/ورد السنين السادن بعطرك
ولفة شيلتك/ساعتـْك/كحلك/ طيبة محياك

يا روعة هالسنين اللي تسايرني على عمرك
يا حلمٍ ما انتشى إلا لجل أسهر وهـو يفداك

(11)
انتظار

هذا وجهك؟؟!!

ما عرفتك!!!
صارت أوصافك غبار
وصارت أحلامي قَفَار
ما عرفتك!!

هذا وجهك وإلا وجه الانتظار؟؟

(12)
مرور

تمريني وأنا المنفي بحد الذاكرة والموت
يمر حزنك بسكة العيون وترتعش رهبة

تمرين الوجع بآخر حنايا همّي المكبوت
تدوسين بخطاك الروح فيني وتنكسر رغبة

(13)
موت

وداااع وكل ما فينـي حزيـن بموتتك يبكيك
.....................وداعٍ يا طهر ذيك السنين اللي لهـا بشتاق
رحلت وما رحل هذا الحنين اللي بقى ينعيك
....................رحلت ومن بقى بعدك يواسيني على الفراق؟

(14)
أمنية

ودي أكون إنسان منسـي ومجهول
.........................الكل ناسينـي وانــا أجهـل الكل
واعيش في دنياي بالعرض والطول
.........................لا لي عـدوٍ في حياتــي ولا خل

(15)
سؤال

لاصرت في درب البصيرين أعمى
........................وينه عصاي يدلني مسلك الدرب؟؟

(16)
حزن

وش سالفة الايام تحــرث عمرنا
وتزرع لنـا غربة والآم وجروح؟؟

إن كان هذا الحــزن خطه قدرنا
في دفتـره ما عـاد لشفاهنا بوح

شاخت مشاويـر الأمانـي وشبنا
حتى العصا ما تحمل لكبرنا روح

(17)
تيمم

صلّيت ركعـــة غيبتك وانحنت أرض
........................بنيت فيهــــا حلم رجعتـــْـــك حارة

يا ساكن أوجاعي تيممت بك فرض
........................لكن ترابك مــــا رحمنـــــي غباره

(18)
طلب

إذا جيتك وانا كلّـي يباسٍ ما رواه المي

طلبتك إن ضميت لشربتك لا عاد تسقيني

(19)
يأس

لو عطشنا ما ارتوينا غير آهات ورزايا
لو يجوع الجوع فينا ما لقى كسرة رغيف

ذبلت البسمة وماتت بالجسم كل الخلايا
والشرايين استضاقت ما بها دمٍ شريف

صارت الدنيا سواد وشانت بعيني النوايا
ما بقى قلبٍ يحب ولا بقـــــى حبٍ عفيف



////////

فاطمة الكعبي

بأمانة مبدعة..!!

تقبلي مرووري..