[احساس طفلة]

مساء الخير ..

احيانا ياخذنا الخيال بعيدا هناااك ..

فنتخيل قصصا بتفاصيلها ودقتها ..

الجميل في هذا ان هذه لقصص تزرع فينا
شعورا لايمكن وصف روعته ^_^

يمه كبرنا ، عادنا بسن عشرين ..
والله عرفنا ان {العشق صار نقمه}

كذبة تورث في النهايات قلبين ..
قلب ٍ كسير وقلب يزداد جرمه

وانتي تقولي لي لهالحين:"تكفين ..
خلك حريصه ولاتكونين لقمه

للجايع اللي يوهمك بالعشق لين ..
يرمي خفوقك وحده بْوسط ظَلمه

بنتك تعلّى شانها ،لاتحاتين ..
جروحها صارت لها اليوم نعمه

اصلا ميكفي قلبها تعشق اثنين..
واحد وسوى بالاحاسيس زحمه

ذاك الذي لو يبتعد عن مدى العين ..
آحس قلبي مايرى غير رسمه

كبرت احبه وارسمه حرف فـ الطين ..
وآحط يمه قلب ٍ يشير سهمه

وادعى عسى نُكتب بهالعمر زوجين ..
عسى تكون محبتي فـ يوم حلمه

كان الوحيد اللي اذا قال [ اهلين ] ..
آهيم بعيونه من اسباب كلمه

النور كان بنظرتي انه يبين ..
والكون في بعده بلا شك عتمه

يا اماه وينه ودي آشوفه الحين ..
ليته يعيّشني بهالحزن دعمه

ولاّ ينسيني اماني المحبين ..
اللي اسكنت في خاطري دون علمه

سافر بعيد وغيبته عدّت سنين ..
لكن احس انه معي دوم يُـمه

لامن بكيت اتخيله يقول :[تنسين ] ..
ويمسح دمع عيني بـ أطراف كمّه

[ماقلت لك بسك ولا عاد تبكين ..
بعدك صغيره،مالهدمع لزمه]

من دون ما أشعر اتمتم له ـ انزين ـ ..
واقوم في لحظه لـ طيفه واضمه

صارت معي عاده ، اذا حزني يحين ..
ابكي عشان اظفر بشوفه وألمّـــه

شوفي دموعي لاعرفت ان اهو زين ..
وكيف انّي افرح لاشفت منه بسمه

اتذكر ابسط ما حصل قبل عامين ..
كل الحكي ، دقّاتي ان جيت يَمّــه

والله عجزت انساه واحنا بعيدين ..
وشوقي معاد اقدر بهالقلب كتمه

كأنني ملزم ارجع له الدين ..
كأن قلبي يعلن اليوم هزمه

خلاص عدّونــي بـ صف المجانين ..
اللي كسرهم هالعشق دون رحمه

يُمه دخيلك، لا اخطبوني تصدين ..
لاني معرف آعيش من غير اسمه

وان هم يحبوني ترا الخوف بعدين ..
اكون وافي له وبالقلب همّــه

بعدك تقوليلي حريصه وتكفين ..
يمه هيامي له لهالقلب قسمه

احساس طفله