غبار رفوف
وترحـل بعد ما كبرت أمانــي في حقـول الورد
تجر خطـاك/ تتبعثـر على عــذرٍ غـدا مكشوف
تداعب سوسنة عمـــري بنسمات الشتا والبرد
بعد ما كنت أظــن إنك دفاي ودربـي المعروف
ولكن خانت غيومك سمــــاي وهزنـي هالرعد
وهدّم سيلك الجــارف حدود امني وأنبت خوف
سنيني ممحلة تعكس ظما ذيك الصحاري الجرد
تصـارع هالذيــاب بليــل يكثربــه صليل سيوف
عيونــــي ذابلـــة تنطـــر إجابـــة مقنعــــة للرد
تهل دموعها حزنٍ على شمسٍ غزاهــا كسوف
رواياتــي سرت فيهـــا الركاكة بالزمـن والسرد
بعد مــا كــان فيهـــا للجزالــة كلمـةٍ وحـــروف
سنينــي مع عيونــي مــع روايـاتي حكايـــة ود
كساها نوح ماضي غلف الحاضر بحرقة جوف
مشاويـــري ألــــم وإلا أمـــل وإلا نهايـــة وجد
تطايـــر من وضعت كتـاب أيامــي غبار رفوف
قصيدي يسترق لحن المفارق من عيون السهد
تشكـــّل ناصيـة قافه من ألـوان العذاب صنوف
ترانيمــي بهــا شـوق الغيــــاب ودندنـة للوعد
تسافر فـي خفـا روحـي عتاب وصفقتين كفوف
مشاويري/قصيـدي مــع ترانيمـي خواطر بُعد
تخط حروفها ريشة رحيلك/ والعــذر مكشوف
/
\
نهايــة جـرح
ياجـرح وش عـــذرك إذا قلت معذور؟
تـرى العـذر مــــــــا ينفعـــك لو تعذرت
بانت نوايــــا غيبتـك قبــــــــل الحضور
وشعــاد لـو كـــان بحضـــورك تنكّرت؟
ثورة زمـن جـارت بهـا اسطـورة النور
لا من رفعت النــار باعـلامـك وسرت
سجّلـت فـي دفــتـــــر غيـاهيبـك سطور
وعلى جريدة "ما مضى" الوهم حررت
غلبت يـا جرحــي بالابــــداع "طاغـور"
و"حصان طــروادة" امتطيتـه وسافرت
و"جنات بابــل" تفرش دروبـــك زهور
و"عشتـار" تبسملك إلى مـن تمخطرت
وهـذا أهـــو كيوبيـــد بالعشق مشهور
خلّــــــه يعلمـــك العشــــق دام قررت
وهذي "المدينة الفاضلة" ترفع السور
تستقبلك ضيفٍ بهــــــا اليــــــوم نوّرت
والفلسفـــة عجـزت تبـــادلك بـ شعور
إن ضاع فانوس الحقيقة وش اخترت؟
أكيـد يا جرحــي بـ تختــــارني حضور
دامـك تعبت غيــاب:عــــذراً..تأخرت:
مـا عـــاد فينــــي قلب يستقبـلك نور
دنيـاك ظلمــة عفت احضانها وطرت
وذي جنتــي ما عــاد في جنتي حور
تشتاقلك يـا جـــرح دامـــــك تكبّرت
والورد ما عـــاد فـ بساتينـــه عطور
تنفــح عليك اطيـاب لا مــن تعطرت
لملـــم بقايـــا مــــا بقــالك ومعذور
هـذي النهايـة حرفها اليوم سطرت
فاطمة الكعبي