سكّيــــــــــــــن

[عبد الله الشعيبي]

مشاركة أولى في هذا المنتدى الجميل .. آمل أن تنال رضاكم


خذت بيدينها ولسانها مرهف ظما السكّيــــــــــــــــن
ثلاث أيام تكسيها لياليها وهي اتهينـــــــــــــــــــــــه

بكل حرف انكتب يشهق وروحه تنوخز وتليـــــــــن
بكل نهشه يفيض القلب منّه دمّ تلوينـــــــــــــــــــــه

صَمَت كلّه ولا حتى نِبَس بحروفه التسعيـــــــــــــــن
وكنّه منزوي في صمت قلبه .. صبره ايعينــــــــــــه

تجلّد بالسكوت المُرّ .. وهشّم فيه دمع العيــــــــــــن
وسط قلبه بكل أخطائها تسكنه وتزينـــــــــــــــــــــه

قرا وجهه على مراية سنه مرّت بزين وشيــــــــــن
ولملم وجهه المسكون منها بزينه وشينـــــــــــــــه

زمن يا نورسة ساحل ظماه ابوشوشة مسكيـــــــن
يدوّر عن حبيبه غير .. مثله حييييل مسكينــــــــــه

لها قاموس من روح اتّباهى به من التطميــــــــــن
وتنثر في سنين غيابه اللي مات تطمينــــــــــــــــه

لقاها .. غمّض العين اليمين .. وباليسار سنيــــــن
بها شاف انّ أحلامه ازهرت ع شفاتها زينــــــــــه

رمى الدنيا .. رمى العالم وراه .. وصار كلّه الحين
رسمها كلّ شيّ راقي نقي وجدّد عناوينـــــــــــــــه

مطرها بالغلا شوق الوله .. دمغة رضا وتبيــــــــن
ليا شافه بني إنسان قالو : ايحبّ .. بيدينــــــــــه !

خذاه العالم الثاني .. بصدقه .. راااح وين وويــــن
وبعد شهور .. مثل دهور .. هواها يفوق تثمينــــه

تأكّد إنّ له معنى بذاته .. والهوى تكويــــــــــــــــن
وهي تدري وما تدري .. وضايع منها تكوينــــــــه


وفي غمضه من الغيره خذت بشفاتها سكّيــــــــــن
ثلاث أيام تكسيها لياليها وهي اتهينـــــــــــــــــــه

مسقط 2010 م