هوجاس الألم

[أنا الدرة]

هذي الجصيده كتبتها أول ما دخلت الجامعه وعشت فــ سكن ،،، كتبتها فلحظه كنت أنتظر فيها رجعتي للبيت،،،و و و لــــكـن انصدمت إني راح اتم اسبوعين فالجامعه وبعد اسبوعين برجع البيت

لي ضاقت الدنيا على قلب انسان
يلقى الشجى والـــــحزن يملى حياته
يلقى الألم ويبقى الندم وكل الاحزان
بالذات لي صــــار القلب فاقد غلاته
تعبت وضاقت احوالي صبرت وزاد بي الكتمان
ولكن ارحموا حالي تراه القلب كره ذاته
أعيش بدنية الوحدة أسيره بعالم الحرمان
وحيده بروح مأسورة وقلبا ً عافه سكاته
أدوّر ذاتي يا عالم دخيل الله أبي تحنان
غريقه في وسط بحرا ًأضارب كل موجاته
أناظر والأمل يكبر أشوف شراع أو ربان
أبي ألمح لي أي انسان أبي ألمح له طلاته
صبرت أناطر اللمة تروّيني روى العطشان
وهوجاس الألم خيّم وأخذ من قلبي ساحاته
أهوجس والعقل تايه أبي رد لفكر حيران
أبي رد لسؤال القلب ولا ألقى إجاباته
غريبه يازمن عمري تباعدني عن الخلان
غريبه كيف أبستحمل أنا وقلبي ومعاناته
أبعثر روحي أحيانا ً وأشلائي بعض أحيان
تباعد بين خلي وبين قلبي وطول مسافاته
أنادي ويـــن يايمه أخوي،اختي،أيّا ً كان
وفجأة أسكت أتمنى يمر الوقت بلحظاته
أسولف مع هوجاسي وفكري وقلبي الفرحان
أقول اليوم بدت تمضي وبكره بس بباته
وبعد بكره ترا برحل بشوف أمي والخلان
بشوف أختي ويا أخوي وحوش البيت وسبلاته
وفجأة أنصدم بإني بتم اسبوع مع اللي كان
ويوقف قلبي مستغرب وتوقف كل نبضاته
يادنيا بس جوليلي ترا قلبي غدا تعبان
ترا بندم على وقتي وعلى كل الذي فاته
أحس بحرقة الغربه تصارع قلبي الحيران
و أنا أروي لكل إنسان عنا بعدي وحكاياته
أنا حنيت ياشعري ترا حنيت للأوطان
ولكن شعري وش بيده سوى يسطرها أبياته
بعدت بعيد عن داري وعن بيتي والجيران
ولكن جلبي مستحمل يبي يحقق له رغباته
أنا درة وسط دانة أنا نقطة وسط ديوان
أنا جيت أبهدي الشعر واهدي كل عباراته