بنت السلاطين

[خليل المعمري]

مساكم الله بالخير
القصيده اللتي شاركت بها في
مهرجان الشعر العماني 2014


تحت غر السحاب اللي غدت فوق الجبال جبال
تربت جادل ن بالعز جات تفوح سيرتها
تسميها الرجال (عمان)غير اسميتها يارجال
كريمة اشوس اعزاز السلاطين وبنيتها
هنوف بجيدها عقد ن وبسفل ساقها خلخال
تغار ام الحلي وام العساجد من حلاوتها
وهي لا اهتزت كبار الرواسي بسوء الاحوال
رست اقدامها بالارض والجوزاء غرتها
ربت حره مثل هالريح لا هبت بدون اغلال
وعلى جمر الكرم فاحت عشان الطيب دلتها
واذا دق الحديد بهالحديد تهد واد ن سال
حميتها تقل جمرة غضى..والبرق فزعتها
كريمه..ضيفها يقرب على العزه وطيب الفال
يتيمه ماولدت هالارض للحينه خويتها
رضى عنها إله العرش في سبع ن طباق ثقال
إلين ان رحمته من فوق ذات بروج حفتها
ونبت فيها الامان وطالت اغصانه وخيره مال
إلين انه سجد لله شكر من فوق تربتها
وعلى اطراف صحراها نما الهيليه واليامال
وشمت من نسيم البحر والساحل سفينتها
عطاها الله من صحرا ومن بحر وسهل وجبال
وفرق في مواردها..وفرق في طبيعتها
ومعا ضوء الفجر ثارت من اكرم عم واكرم خال
يقديها على كسب النفيس الصعب منبتها
سرت مسرى سنافي ن شديد ن عاقد ن حلال
على بسم الله الرحمن ..والرحمن يمتها
واذا فيها بليا سيف ن او حربه ولا سربال
تقص بهالصعاب القاسيه من وين لاقتها
إلين امسى لها قدر ولها صيت ولها منزال
في كل جزء ن من العالم ..بكل جزء بمساحتها
وفي حل الامور اللي رهى فيها الجدال وطال
كبيرات الدول تاثق بها وتاثق بحكمتها
بنت..بذراعها مجد ن يسولف به زمن واجيال
وتحكي عنه الايام لاقصت حكايتها
طويل ن ضافي الاكتاف وجنوبه فهق وجلال
يروع لا وقف من كبره الدنيا برمتها
بلادي..اعظم بلاد واعز من الولد والمال
نطيح ولا يطيح العز من رفعت عمامتها
حفظ وجه الزمن وارخ مواقفها وفيها قال
يشرفني وانا سمو الزمان احب هامتها
عليها الف بسم الله من الضيق ومن الغربال
عضد شبه الجزيره وخشمها وحزام قامتها
متى ماتصبح بصحه الين تبات بافضل حال
وفي كبد السما الدنيا ترفرف فوق رايتها