مكتب الدكتور

[محمد بن ضحي]

سامحوني على طول الغياب
هذه القصيدة لتسجيل الحضور وكسر حاجز الغياب

مكتب الدكتور

من قبل ادخل مكتب الدّكتور خزّتني بعين
وتناثرت من رمشها بسمة وعلقت بالشفاه

ثم قلت في نفسي تهيّد ريض هدّي حبّتين
بأنواع كلمات التّروي قمت اخبّي الانتباه

ربعي يقولون: الرّجل لامن ثقل يدعى رزين
وادري بأن طبع الرّزانه زاد أهل الجاه جاه

بسّ المهم حاولت أسرج خيل خفاقي لحين
عشان لا من صدتها أتبخّر ف أي اتّجاه

اسري بها ببساط شعري في سماوات السنين
واعتاش من نظرات عينٍ توهب الشايب صباه

هي بسّ لحظة واورثتني فوق حظّ الأنثيين
من ثمّ باعتني لنفسي ثم شرتني آآآه آه

قرّبت منها وقلت يا زينه انا محتاج زين
ممكن تبيعين العذوبه لشاعرٍ سحرك خذاه؟

جاوبني صوت الكعب: قفّت. وانعقدبي حاجبين
وايدي تدثّر خدي الراجف وتسأل وش بلاه

دارت عليّ ورجعت بمقادر ثلث وخطوتين
نظراتها كالسّهم يطعن صدر صبري وكبرياه

في ركبتي زلزال في صدري براكين الأنين
ونفسيّتي طفلٍ وقف طابور والأبره عناه

ألطف يا ربي مدّت يديها ع صوب الصّدر لين
زاحت قبل كم سانتي تفتح ع دكتوري هناه

ثم قالت بصوت الجرس لي يصدح ف معبد بكين
هذا الغلا اعشقه حيل وفارع ف قلبي غلاه

نمت وصحيت وما دريت الا تنادي يااا سمين
وش له تناظرني ترى اخوي دكتورك اهااه

وتبعثرت فيني الرّجوله يا رياحي وين وين
من وين ما تبغي انثريني ابعديني عن فلاه

هي تجربة قررت اذكرها لكل شابٍ فطين
عشان يعرف أن تحرّش فأجوديه ذا جزاه

دكتورنا اسمه حمد واخته اسمها ياسمين
بس ياسمين الفاتنه رمّستها قبل الصلاه

البنت يللي احبطت مستكشفين البنسلين
تنهي لي السكر ف شوقي لا تصيعب بي دواه

قالت لي محمد فديتك داو جرح القارئين
وابصم بأن شعرك خرافي وأنت ادرى بمستواه