" ف بيوتنــــا أربعـــــه يْصلـــــوا ع سجّـــــــاده "

[منذرالفطيسي]

صباح الخير أحبتي
بحضورك لا يكون للغياب حضور
ادامكم المولى
اتمنى معانقتكم

*******************************

( لمن لا يهمه الأمر )


يا جــــرح .. ما همني منهـــو يولفنــا
تعـــال بقعــد معـــاك شـــوي وزيــــــاده

تعـــال نحكــي عن اللّــي ضاع .. ضيعنا
هالوقــت ياللّــي غدت عبّـــاده أسيــــاده

هالعــدل ، هالظلــم ، لــــي دايـــم يعذبنـا
هالهـــمّ يالّلـــي لقـــى فصدورنــا وْساده

يا جـــرح .. لو كنّــا ننــزف مـــن بعبرنــا ..!
دام الأذانــي .. مسامـع .. صمّهــا عــــاده

ان جينــا نحكـــي’ سمـوّ الظهْـــر’ جاوبنا
"لذلـك الصمــت صرنــا نعبــده عبــــاده "

احنــا تعبنـــا ، وثابرنــا ، وأنجزنـــا
ويوم انتكبنــا جميعــاً شلّــــح زنـــاده

يا مجتمع ، لا .. دخيلك .. لا تعايرنــا
هـــذاك لانّه , رشـــا , في صدره قلاده

إنّـــش قبل المؤذن ، ديـــك حارتنـــا
من يبغــي يْصـــون كفّه الفجر ميعاده

ابونا خلّــص عــرق كــدّه وصاحبنــا
رجلـه ع رجلــه // ف يده قهوته الساده//

صاحبنا يشــري ب ثلاث اربــاع راتبنـا
لعبــه صغيـــــره هديـــة أصــغر اولاده

الله يزيـــده .. يليتـــــه شـــاف حالتنــا
" ف بيوتنــا أربعــه يْصلـــوا ع سجّــــاده "

جارتنــــا المْطلقه تطلـــب ف مسجدنـــا
وختها من الجــــــوع تبغي تصير صيّــــاده

فلساننــا حــق ، بــس منهــــو يوجبنــا
نيراننــــا تنطفـــي وتمـــــوت وقـّــــاده

// الصحــــه // صــارت تعالجنا وتقتلنا
لذلك الشعــــب كلّـــه فْ سيــــد العياده

الا الفقيـــــر المسلّــــم امره لْ ربنـــــا
فلوســـه يا دوب تكفــــي قوتـــه وزاده

جرائــــــم القتــل زادت ويـــن شرطتنــا
ما همهـــا الا إذا "التلوين" أحــد زاده

ثقافــة الغـــرب رقـــدت عنــــد مرقــدنا
والديـــن طيـــــّر الى الاسفلـــت منطاده

البنــــت أزمـــه خطيــره والسبب احنــا
رضينـــا تدرس مع اللــي الخبث به عاده

الأب لاهـــــي " فلا أسمـن ولا أغنـــى "
والأم لأنهـــا أوثقـــت ما هـــي ب نشّــــاده

لو بـــاعت العرض ليـــش نْقــــول صدمتنا
واخوهــا قدّامهـــا يرمـــس مـــع غــــــادة

باعـــن وضاعـــن سوا قلّــــه تشرفنــــا
قلّـــه عساهـــا عن الاعـــراف نــــــدّاده

جلاّدنــا لا سهينــــا قـــــــــام حاسبنـــــا
وجلاّدنا سارقنـــا منهــــو جـــــــــلاّده .!؟

صوتنــــا للّــي شعــــاره كـــان ، ينقدنـــــا
وأمّــــن بأصوتنـــا مستقبـــــل أحفــــــاده

يا دار ، نسكــــــت يلـــــــو هالحــال يذبحنــا
عشـــــان هالعمْــر ما ينقـــصّ ميـــــــــلاده

نكـــبر وننســـــى ي جرحـــي والله يلهمنــــا
صبـــــرٍ ع وقــــــتٍ غـــدت عبّــــاده أسيــاده



منذرالفطيسي