القصائد الفائزه في مسابقة الشعر الشعبي

[سالم الريسي]

أصحاب النجاح المركز الأول

ما دريت أن النجاح يتعّب أصحاب النجاح
غير يوم إنّي وصلت أبواب أحلامي وطرقت

كنت أقبض كلّ باب و كانت يديني ( كفاح )
تبرق أحلامي.. وكلما تبرق أحلامي برقت

ما شهقت إلا ونا لي زفرةٍ بعد ارتياح
وما زفرت إلا ونا بي كربةٍ لمّا شهقت !

قوّة الرغبة (صدر) .. ووضوح أهدافي ( وشاح )
ما سبقت الغيب لكن ..( غلطة الماضي ) سبقت

ابتديت أمشي وأناجي : بدّل الريح برياح
يا الهي أنت تعلم كم تجمّلت ورفقت !

صرت أشوف الحلم يشبهني على عدة نواح:
البراءة / والجروح / وضيقتي يوم اختنقت

والأماني ما تجي من صحوةٍ عند الصباح
كان نمت الليل كلّه .. والصباح ان لاح فقت !

ما نسيت انّ العلا ( يأبى ) مجاليس و رواح
كلّما غمّضت عيني لجل تغفى / استضقت

ليتني أقدر أطير وكانت ايديني ( جناح )
بسّ ويش اللي يثبّت ( هامتي ) لامن نفقت ؟!

ما توقّفت / وسعيت / وخطوتي رغم الجراح
مثل ( برقٍ"ن") يبرقُ...وْما تَحْسبه ( دقات وقت ) !

أؤمن أنّي لو يراقب رقبتي ( نصل الرماح )
دام ربّي ما كتب ... ما كان عن موتي زلقت !

القدر ( صاحب وفي ) كلما أخوض البحر .. لاح
كان يرمي طوق كلما شافني طحت وغرقت !

والصّراحة.. أزعجتني عيشتي وسط انفتاح
لنّني من هـ ( التّعرّي ) كم تحمّلت و زهقت !

من بنى ساسه على ( ساس الخطأ ) ليقول : طاح
ومن حرق نفسه بـ نارٍه لا يقول : أآخ احترقت


حمود المخيني














المركز الثاني أخر كلام



عود إلى الظل الخفيف المنكسر فيني
خلني أعيش برجــــــعتك أحلام كذابة

شوف الجهات الاربعه كلها تناديني
إلا طريقك يا حبـــــــيبي غلق أبوابه

كنت اتقهوى منك أحــــلامي وْتغنّيني
وأصبحت اشكي من فراقك واتقهوابه

ضاعت من أسبابك موازينِي و... عناويني
لا ردها الله سيرةِ إغْيـــــــابك وأسبابه

من بعثر طيور التشاؤم في مياديني
من عكر أجوائي بخطوة ضيم وثابة

كنت الحنين اللي يغـــــــطيني/ يدفيني
كنت الشعور اللي بفصل البرد ادفابه

لازال باقي لي امل في باقِيِ سْنيني
انك بترجع لي وطن وآقبّلِ تْرابه

لاَ تْقول زولك ياحبيبي جالسِ بْعيني
جالس نعم .. لكن ترى جالس علىَ اعْصابه

ضيعني قلبي قَبْلِ منته تنكر الدين ِ
يوم احترق من نار شوقه دفترِ حْسابه

الحين أذكر همسة المهزاع في اذنيني
الياهل امبونه تراهِ يْوٍسّخِ ثْيابه ) )


ابراهيم المسعودي

المركز الثالث ( هذا المساء )

هذا المسا بفتح لها قلبي ابواب
ياالله عساها تستريح ف (ظلاله)

بفرش لها جوري وكيذا وعناب
إلين توصل في حدود الثماله

وجدي عليها وجد شب~ن وشياب
يبكو على شخص~ن ميتم عياله

إلها خصر فترين ساحروجذاب
لين أقبلت كنها أقبلت لك غزاله

ام حربة~ن درمى شبيهه مع الناب
لو صابتك يغدي شفاك استحاله

حيانها قوسين والشوف نشاب
والقوس بالنظرات يرمي نباله

ورموشها تسجد لها رموش واهداب
ولا الشفايا مثل جمر الملاله

وعيونها الثنتين في تهمة أرهاب
كل واحده إلها قضيه محاله

معذبات بدون ذنبٍ ولا اسباب
عامين ينتظرن ردود العداله

ثم~ن صدرحكم~ن على شنق الارقاب
سجانهم واقف يفتل حباله

وإذا قفت كالشمس من دون سحّاب
وقت الغروب مغادره في عجاله

الشعر شلال~ن على الظهر منساب
منهاالجمال يصوغ قصة جماله

في حبها قلبي معذب ولا طاب
والعقل واصل لين حد الهباله

لو يحرسوها الناس بسيوف وحراب
و وصالها تابوت بسعى لوصاله

هذي الأصيله من سلالات الاطياب
لاتسالوني هي من اية سلاله

في مدحها حرفي مقصر و كذاب
لو تعرفوها لا تقولون (هاله)

أحمد المعمري