دواويين الشعراء والشاعرات المقروءة للسلطنة الأدبية

على ضي القناديل وسيول الفكر والانفاس
جلست أدعو همومي لين ضاق الفي في همي

جلست أزكي من انفاسي أحاول أضفي الاحساس
ولكن روح أنفاسي ترد وتستوي سمّي

ألا يا حظي الأعمى ويا ليل ٍ بكاه الياس
ويا نيران أعصاب ٍ تشرّب سمّها دمي

تقهوي من أحاسيسي على كيفك وصبِّ الكاس
ولا تحاتي من افلاسي أنا أسقيك من يمّي

وانا اعطيك من دمي حبر والقلب له أطراس
لاجل ما تكتبي الواقع مثل ما عايشه حلمي

لاجل ما تعرفي إني عشت في غربتي اطعاس
وريح الشوق تلعب بي .. تثور وتعصف بلمّي

تذكرتك وانا ساهي على شاطي الفكر جلاس
وخانت دمعتي عيني وجافتني وهي تدمي

تذكرتك وانا فارس وطير ٍ حر كالجرناس
وانتي فوق خيل الحلم تجنح خيلك لسلمي

تعودتك نهاري ضي وفي ليلك أنا نبراس
وفي كل خطوه تخطيها على اسمي كم تسمي

نسيتي تضحياتي لك ، ولو عديت دون قياس
نسيتي كل ذاك الحب ولا همك وتهتمي

على كل الغرام اللي عطيتك دون هذي الناس
تناسيتي ودادي يا شقايه .. يا سبب غمّي

طبع غلاب قالوها وانا كذبت كل الناس
لاجل حبي واخلاصي صرت في حبك المعمي

غريبه كيف أيامي تبخر حلمها أنفاس
والأغرب كيف أنفاسي ترد وتستوي همي

يعقوب الحوسني