منتديات السلطنة الأدبية - .... في غروري تماديت ..!

مساء الاحاسيس العذبه ..~

من الارشيف ، اتمنى ان تنال الرضى : ..

جايز عشان الخوف دربك تباطيت..
وجايز بهذا الصد بكيت عيني

بس الاكيد اني بكل شوق حبيت..
وادري بقلبك من صميمه يبيني

وتدري بان ضلوعي لحظرتك بيت..
وان العشق في جيتك يحتويني

واني على النسيان والله عيت..
كم لي وانا احاول ولاهو بيديني

احس بك في رجفتي لا تمنيت ..
تحبني اكبر من العشق فيني

واحس بك لامنني للشعر جيت..
وافضيت له عن شوق روحي وحنيني

وانا لو اني في غروري تماديت..
وجفيتك احيان وتناسيت حين ِ

لاتحسب اني عن غرامك تخليت ..
ماهو ضروري كل عشقي يبين ِ

خايف الا مني فرحت وتهنيت ..
اتفرق الاقدار بينك وبيني

ولا يزعلك طبعي،ترا فيك جنيت..
واغار حتى من هواي الدفين ِ

تكفى ترا واللّه م البعد مليت..
اعطف عليّه وبحنان ارتجيني

حسسني انّي في عيونك تعديت..
كل المشاعر/واسال ان غبت ويني؟

ياصاحبي وش ينفع الحب لا اقفيت..
وحل الغياب وْأظلمت به سنيني

ماينفعك عقب البعد تمتمة:"ليتـ ..
ومايرجّع الضحكه بكاي وأنيني

ادري بأنّي في غروري تماديت..
لكن تاكد وحدك اللي اتعنيني

احساس طفله