\
جمر وجليد
مثل ما تاكل النار الحطب تاكلني همومي
وانا كلما بغيت أطفي همومي أشتعل أكثر
…..
أقول الدمع ما غير الدموع تبلل عزومي
حسافه لا غدى دمعي سحابه تنزف وتكبر
يمر الدمع اعتاب الجروح ويحرق هدومي
ولا ألقى سوى بعض الدخان يواري الدفتر
…...
سألت الليل عن بعض الظلام ورحلة غيومي
صحيح أن الغيوم تجيب للعاشق وطن أخضر
ولا جاب الظلام إلا ظلام وغربة نجومي
كذب كل الكلام اللي نقوله بعد ما نسهر
……
كذب أن الظلام اول أمل يحتاج له نومي
يجي ويجلب معه حزمة ورق وشموع من سكر
نسيت النوم ما عدت أذكر أنه مر في يومي
مثل شكله احد يغمض عيوني حلم واتبعثر
بكت كل المرايا غيبته ويسأل عن علومي
وانا الجمر الجليد المحتضن للثلج والمجمر
نعم خان الرسائل كلها رجع لي البومي
وسافر خانني ويا ليتني مثله بعد اقدر
مثل ما تحرق النار الورق تحرقني همومي
وانا كلما بغيت اطفي همومي أحترق أكثر
\