أبكي على الدنيا وذا الحال الكسيف
حد جمّع الأموال وحد للفقر شاف
بعض الحلوق من البلل ترشف رشيف
والبعض حلقه صار يشكي من الجفاف
البعض يبحث عن كساسير الرغيف
والبعض يسرف مثل حفلات الزفاف
جايب رعاة الطبخ وجايب كل شيف
غرق ذبايحهم من أغنام وخراف
صار البطن في عيشته صاحب حليف
كل الأكل في حضرته جاهز و صاف
ياكل وبثقل بعدها يزحف زحيف
وينام ليله بغلى أنواع اللحاف
والبعض نايم فوق طابوق الرصيف
محد(ن) عرف وضعه ولا بالحال راف
صار القوي ياكل من أموال الضعيف
والناس صارت من معاداته ضعاف
من كل عاجزأو مشرد أو كفيف
همه يدوس بعزته قلوبن نظاف
ليمن ملك سلطة وماله أي وصيف
ايجور في الدنيا وربه مايخاف
سموه عمي وكل لفظـ(ن) له ظريف
أما كبير السن نادوا إسمه حاف
راح احترام الناس للشيب العفيف
مايعرفون بدينهم ستر وعفاف
واللي سرق مليون قالوله شريف
واللي سرق من جوع مجرم مايعاف
صار الربا يطغى على البيع النظيف
والتاجر الطماع في الأسعار ضاف
ليمن سمع صوت المآذن تستضيف
عباد رب الكون بيجيه الكلاف
يتحجج بمرضه وسقمه لو خفيف
ويطنش الواجب و بعد يقول طاف
كلن مشى في شوق للخل الوليف
بسمه تغنى بالشعر واعلى الهتاف
أهمل فروضـ(ن) واهمل الدين الحنيف
مايحفظ القرآن لاعمَ وقاف
صرنا مثل بوجهل وأظلم من ثقيف
كيف ابتدينا وكيف ينهينا المطاف
إلطف بحال الناس يالله اللطيف
إنته بديك الأمر نونـ (ن) بعد كاف