[محمد المخيني (ود صديق)]

مساجلة رزحه بين محمد ود صديق وخالد قماط .

قال محمد : 1
صلوا على عبد احتمى في غار ثور
يوم أصبحت كلها قريش ادوره
وتالي تحيه ع الغايب وعلى الحضور
وعلى الذي زاهي وسحرني منظره


قال خالد : 2
علي النبي صلينا وكشفنا الستور
نرجي الشفاعه والعفو والمغفره
محمد مريتك عاد لي خمسة شهور
صبحت علينا شيفتك متعسره


قال محمد : 3
ياصاحبي ما هو تكبر أو غرور
دنيا شغلتني عنكم والمعذره
تعرف خذتنا حن امور ن في امور
و ما يخفى عنك حالتي مدهوره


قال خالد : 4
راعي الميانه ساق لي يملة عذور
ولزم علينا نعذره ونقدره
جليت عيني وزدتني نورن فنور
بوصيك جابل لا تجف المحبره


قال محمد : 5
الله ينور باصرك طول الدهور
ويدلك الله لدروب ميسره
عندنا المحابر تارسه مثل البحور
والحمد لله كلها متوفره



قال خالد : 6
كلفت قلبي لايتظاهر بالسرور
شين يحيده وشي برما يذكره
شي مالزرع يسقى ولكن مايثور
وشي مالزرع ينظر ف ارض مقفره


قال محمد : 7
ياصاحبي المعزه في قلبي سطور
كله مخطط بالقلم والمسطره
خالد بغيت تكون لي جسر العبور
وادي تحدر لازم روحي أعبره


قال خالد : 8
وقف وحاسب عند اشارات المرور
وجابل صحيبك عن يفل وتخسره
محمد بشلك فوق كتفي والصدور
وباخوض بك بحر عميقه مغازره



قال محمد : 9
بدعيك حارس سد لي كل الثغور
وانصب مخيم في فوادي بعسكره
خايف شلولك لي يسبب لك كسور
وتصبح عظامك يالوفي متكسره


قال خالد : 10
تبغى حراسه وانته ساكن وسط صور
باخبره راعي الامر باخبره
شليت فيل البارحه وتسعة نسور
يوم لاشلولك مايهز فيني شعره


قال محمد : 11
الله يعزك صاحبي طول العصور
ويرزقك المولى شجاعة حيدره
والشاهد الله اني ياربعي فخور
بالهاشمي خالد وحسن معاشره


قال خالد : 12
عند اللزايم وحل حزات الخطور
يحرم عليه صاحبي ما ودره
ابغى يتفضل صاحبي صوبي يزور
بعقر ذلول له ابيميني بنحره


قال محمد : 13
تسلم يمين الناحر ما عليه اقصور
حاتم زمانه حلل خيله واعقره
البيت عامر ما ظني ابد مهجور
ودوم السنافي عندكم ايش مخيره



قال خالد : 14
الشاهد الله زال عن قلبي الكدور
وصبحت اموري كلها متيسره
مشكور يالصاحب على طيب الشعور
باودعه راعي الطرب باعاذره