مساجلة جديدة بتاريخ 24 - 6 - 2010

سليمان الرواحي · #1 02-07-2010, 09:04 PM

رمسة مقصب بين الشاعر سليمان الرواحي و
فريش العويسي في وادي دماء بتاريخ 24/6/2010م
سليمان
سميت به لي عسعس الليل بغلس
ونفس صباحه من عقب المعسعسه
وصلو على من جاه جبريل بهمس
قاله قرا بسم اللاهي ودرسه
فريش
بنثر سلامي ملحقه كدر الدنس
شطن مصفى والحزين يأنسه
وتحيتن شروى رياحين الورس
ماطاح فالأرض وتشله لمكنسه
سليمان
م الوادي جينا بني رواحه بن عبس
نشارك صحاب المحفل وناسن رامسه
نوبا لحضرمي معنا ما نام ونعس
يسري ولو كانت ليالي محندسه
فريش
بوصولكم أعلامنا ما تنتكس
والنصر من ربي الاهي نلمسه
والنحس قفى وفي الجلالي محتبس
والباب ظباط وجنودن تحرسه
سليمان
تبضع يتاجر من بنادير الحبس
قالو لنا شي م السلع متنافسه
ونبغى نسافر ماشي فلخاطر بهس
أراقب على الشابك طلوعه ومنكسه
فريش
عندك نهور الطامي وم الوليد غرس
متخاف تصبحلك غصونه يابسه
زيد التجاره ولا تحاتي م الفلس
والبنك يسعفها يدين المفلسه
سليمان
متشوفني قدامك بحزام وفلس
مبغى فوايد من بنوك مسيسه
معنا علوم الحسبه ويالدارس درس
عنها الغوازي وأموالن مكدسه
فريش
قارون جمع ماله فدنا ماجلس
أزى فأيامن تعيسه ومنحسه
ولي رماني أفكاري عليه تحس
أزيت في نومي وحلومي وسوسه
سليمان
يفريش لاتخلط على صفح الطرس
واضح كلامي مايباله مغطلسه
من شيبك ودعاك تمشي ف الطعس
حافي ولاعندك صحيب ترامسه.
تمت المساجله

سعيد العيسري · #2 02-07-2010, 11:12 PM

الله اكبر...
كلام في قمة الروعة وعجبنتي القافية كثير رغم صعوبتها الا انكم ابدعتم بالتبحر فيها
يعجبني فيك تنوع الشعراء اللي تساجلهم والشكر موصول الى الشاعر فريش

تحياتي

سالم الوشاحي · #3 03-07-2010, 08:04 AM

ماعليكم زود أبوعبدالله وفريش

مساجله جميله .. وقافيه صعبه

ولم تصعب على الشعار

خالد الكويلي · #4 05-07-2010, 10:28 PM

ما عليكم زود كلكم مبدعين

دمت بود