حلم ليلة عرس
( آهين ) يا من تكسري آخر عواميد الكلام
آهين يا تابوت ما رمم حواري الميتين
كنتي هنا صفصافة – ن- وأغصانها مثل الخزام
تتنفسي بعشقي وانا كنت المطر والياسمين
خلك هنا
ياطفلتي
ياللي مساماتك أنا/ وأنتي أنا
خلك هنا في داخلي
والله مااا ودي أرووح واتركك
أو ينكسر بي هالعمر
وأتعود أني أخسرك
وأنتي هنا
في داخلي
سبعة كواكب من رخام
خلك هنا
ماجيتلك متسول - ن- يشتاق لأجساد الحمام
جيتك وانا سيد على أكبر جيوش الفاتحين
كنتي هنا مرسومه في أعظم تواريخ السلام
تستنزفي دلو السماء في طالع أبراج اليقين
وأتخيلك
وللحين ما ودي انا اتخيلك
في موكب العرس و(حواجيل) الزفاف
مثل الجفاف
حد أغتصاب الروح في
قحط الضفاف
من علمك تتسوقي بالحب في سوق الظلام؟
وتشاغبي/ فم العطش / بين الصور/ و البائسين؟
وللحين ما ودي أنا اتصورك
ترميني هالساعة نذور
وأني أنا منذور قلبي لليال
يتأبط أكتاف الهلال
والحال يهديني العناء
ثقل السماء
ثقل المدامع والبكى
آهين لو ما تنبلج ذكراي بك مثل الوسام
أو تنكسر قنينة الغيم بزحاف العابرين
وش سالفة هالطين لا سال وكشف بي هالعظام
وش سالفة هالحب لا مشط قلوب العاشقين؟
ياليت لو تبقي هنا
ياللي مساماتك انا
وأنتي انا
ياليت لو ماتكبري
وتكوني في قلبي ومرايا داخلي
سبعة كواكب من رخام!
ياليت لو ما ترحلي ياطفلتي
وخلك هنا
عبدالله البطاشي
2007
