 |
قسم عشب الليل
إلا الفقير |
|---|
إلا الفقير
إلا الفقير
يركب على كتوفه ضمير
.. يحضن مصير
تفنى الأماني كلها
ويرن ذكراها وتطير
إلا الفقير
تيبس دموعه داخله
يكبر أمله وياكله
ينظر على قربه بعيد
يضحك ويسقي دنيته
دمع جديد
إلا الفقير
يعيش في الدنيا صغير
ياكل فتات
يمشي على شوكه ثبات
وتجرحه هذي الحياة
وهوه كبير
قلبه كبير
عقله كبير
بس انه منزوع الصفات
إلا الفقير
يعيش غير
يخاف من لسع الضمير
ينور الدنيا ويسير
به تحترق كل الحلوم
به تنطفي دنيا وتقوم
له منخلق كسب الحلال
له تامر الشمس الزوال
إلا الفقير
قالوا دمير
حكيه دمير
شوره دمير
وهوه سبب كل الزحام
والله حرام
هذا الفقير
يسابق الليل الهبيل
مثله مثل باقي البشر
بس يختلف في محنته
في دمعته
لازم تصير
مخلوق للصبر الطويل
إلا الفقير
ما يمتلك هذا الرغيف
وكل أيامه خريف
هو بس له عين وتشوف
تنظر على اطراف السما
تاخذ من العالم ظما
والليل ستار العيوب
صحيح هو مفلس جيوب
بس ان عقله لا سقى
أرض المحل عاش وبقى
ولا حياته عالكفوف
من عاش ما لازم يعوف
إلا الفقير
يحب خلق الله جميع
يذكر صنيع
قلبه على فقره وسيع
وايامه السودا ربيع
مادامت الدنيا هنا
في قلوبنا
ونعيش عالدنيا جميع
ليه الوجيع ؟
ليه الفقير يكون طير ؟
مأسور واجناحه كسير
واوجاعه الثكلى دخان
تملأ السما .. تملأ المكان
أحزانه تعم وتجير
في فقر هالدنيا نبيع
إلا الفقير
الحاجة اللي ما تثير
في داخله
تكبر كثير
والحاجة العمياء لها
في عالمه شوف وبصير
هذا حبيبه يفارقه
وهذا انحنى فيه الشباب
بسك غياب
خلك على عشك تغير
ما زال في الدنيا ضمير
إلا الفقير
يمسك على هذا الريال
كنه عيال
ويخاف يستر لقمته
لا ينفضح في هدمته
يا سيدي فقرك دواء
يخلي الرملة حصى
واحنا نعيش
الهامش اللي لك عصى
قام ورضى
وانته تطيش
تاكل من الرطبه نوى
إلا الفقير
قهوة وحصير
واشجار والظل الحرير
تفنى الأماني كلها
وترن ذكراها وتطير
.. من عاش ما لازم يغير
|
|
|
| | |
