أحذفه عندك ف الملف

[كمالية بنت السلطنة]

وش سالفه هذا الزمان اللي تعبنا يايبه
كلما على همه قوينا زادنا وهن وضعف!

الناس ما في همها إلا ظهرنا تركبه
وحظوظها في رتبة ن عدت مشاعرنا شرف

ماعدت أفهمهم يبه كل ن يدور مكسبه
هذا قسى وأخر نسى إن الخفايا تنكشف

حتى الحزن صار يتوزع كل شخص ومنصبه
والشوف لو هو بيدهم سووا ضريبه ع الطرف

المصلحه دستورهم لو هو فقير ن تشطبه
والذنب ماعنده فلس يقدر يماشي منعطف

أما الغني سمعا وطاعه لو حكا وش مطلبه
لبيه لو يركب على راس العباد وينحرف

ياهي صعيبه عيشة ن ويا الذياب المرهبه
يمكن مسماهم بشر لكن ذيابه فالوصف

(دامك قوي تقدر تهد بيت الضعيف وتنهبه)
قانون غابه صار واقعنا يجيده للأسف

كم صاحب ن لجل المصالح باع رخص ن صاحبه
ناسي قبل في شدته كم مرة ن جنبه وقف

واللي يسمونه قريب ن ما تهمه مقربه
ينكر وينسى هالقرابه لو تجمعهم صدف

يا بوي وش في حيلتي إلا قصيدي أكتبه
صار الزمن مابه رجا فيه المعاني تختلف

مهما نحاول نفهمه ماظنتي نستوعبه
شفرة كتابه ما يفكها غير عقل ن محترف

يقدر يمشي هالبشر مثل الدمى في ملعبه
دامه عرف يمسك خيوطه عند راس المنتصف

أرجوك لاتزعل يبه من عالم ن ما نعجبه
يكفي بأنك غيرهم/صعبه مثلهم تنجرف

في وادي ن أسمه ردى الناس قامت تشربه
من نوح وأتعاب الخلايق هم يعيشوا في ترف


يا بوي دام إن البشر رقم ف ملفنا نحسبه
اللي يضيق خاطرك أحذفه عندك فالملف
كمالية