لعبة صغار

[مختار السلامي]

السنين اللي انقضت لعبة صغار
والسنين المقبله ما هي سنـييين

انكسرت وصار لي مليون عار
ابتسمت وصارت الدنيا عرين

حاصرت كل الدروب الانحدار
والطريق السهل تشويهة جبين

ما يوصلك الدفـا غير الفرار
من متى الغرفه على الساكن كمين ؟!

ما يذل الوعد غير الانتظار
تحت ظل الوعد صبح العاشقين

نستهين وبيدنا صلب القرار
واقبح الاعذار... انا نستهين

صورتين وعالقـه باقسى جدار
لين مل جدارنا هالصورتـين !!

صورتين وما اعشقت الا الغبار
والغبار اللي بلا قيمه حـزين

عاشقك .. و اللي لواه الانهيار
عايشٍ ما بين شكك .. واليقين

أبسط اخطاءه .. على علبة سجار!
واعظم اخطاءه.. سجاره بالف دين !!!

يا مساء الخير/ والدنيا نهــار
يا صباح النور / والظلمه تشين

للكرامه.. شرط رد الاعتبار
دامني ضيعت.. للغربه سنين

أنت تدري ايش يعني الانكسار؟
يعني عايش وأنت في الواقع دفين!!!