يا ونّتي ونّه بلا حد وقياس

[حميد محمد السالمي]

يا ونتي ونه بلا حد وقياس
ونيتها وهزت جبالٍ مراويس

لو تحسب بميزان رختر أو تقاس
والله لا تكسر جميع المقاييس

ترج في دار المكانيس الاجراس
ويسمع صداها شعب لندن وباريس

عفواً ترا زودتها كثير يا ناس
أستغفر الله وأتعوذ من أبليس

أوهام من فكري بها نوع وسواس
سب الهموم ألي بصدري مكاديس

ماني بشاعر مبدع ودوم حسّاس
ولاني أبو شيبه ولاني بن فطيس

لكن أدون ما بدالي بكّراس
وأخط وأرسم من مشاعر وأحاسيس

مقنع بحالي ودايم أقول لا باس
عسى مع الايام بكسب نواميس

يرتاح بالي كل ما هب نسناس
في دار يرتع بأرضها جملة العيس

من رملة وهيبه وهاذيك الاطعاس
الى ديارٍ ساكنيها الحراسيس

تغمرني الفرحه وبها أزداد نوماس
تقول كني مالكٍ عرش بلقيس

واحب شوف البن في وسط محماس
ما هو بجاهز حط من عام في كيس

هذاك يالي قهوته تعدل الراس
وتزيح من صدري هموم وهواجيس

أدعي ألاهي بالتي تاخذ الكاس
وتكسر تواقيت الركض حزة الريس

وأرتاح من كثرة ديوني والافلاس
وأعيش لحضه من حياة المعاريس.

حميد بن محمد السالمي